अल्वपवयीन मुलीच्या अपहरणप्रकरणी पुण्यातून घेतलं ताब्यात; आरोपीच्या खिशात त्या पुड्या, अन् फोनमधील ती 76 जणांची यादी पाहून खळबळ

१४ गुन्हे दाखल असलेला सराईत गुन्हेगार सुनील ऊर्फ राठ्या गोपाळ राठोड (२८) याने एका अल्पवयीन मुलीचे अपहरण केले होते. तो कोंढवे-धावडे परिसरात येणार असल्याची माहिती वरिष्ठ पोलीस निरीक्षक राघवेंद्रसिंह क्षीरसागर यांना मिळाली. पोलिसांनी सापळा रचून त्याला ताब्यात घेतले असता, त्याच्या झडतीत एमडीच्या पुड्या सापडल्या. यानंतर पोलिसांनी तपासाची चक्रे वेगाने फिरवत त्याचे साथीदार राजन गोपाल नायर (३७), जतीन जयवंत कदम (२६) आणि शुभम संतोष दहिभाते (२८) यांनाही अटक केली.

पोलिसांनी आरोपींचे मोबाईल जप्त केले असून त्यातून धक्कादायक माहिती उघड झाली आहे. मोबाईलमधील आर्थिक व्यवहारांवरून ड्रग्ज विक्रीतून सुमारे १० लाख रुपयांची उलाढाल झाल्याचे स्पष्ट झाले आहे. सुमारे २५० ते ३०० जणांसोबत पैशांची देवाणघेवाण झाल्याचे तपासात समोर आले आहे. ड्रग्ज घेणारे आणि विकणारे अशा ७६ जणांची यादी पोलिसांच्या हाती लागली असून लवकरच त्यांच्यावरही कारवाई होण्याची शक्यता आहे.