पाण्याची टाकी कोसळून 3 कामगारांचा जागीच मृत्यू, पिंपरी चिंचवडमध्ये नेमकं काय घडलं?, VIDEO

पुणे - पिंपरी चिंचवड शहरातून एक मोठी दुर्घटना समोर आली आहे. शहरातील भोसरी सद्गुरू नगर परिसरात असलेल्या एका लेबर कॅम्पमध्ये कामगारांच्या वापरासाठी उभारलेल्या पाण्याची टाकी कोसळली. आज सकाळी 6 ते 6.30 च्या दरम्यान घडलेल्या या दुर्घटनेमध्ये 3 कामगारांचा जागीच मृत्यू झाला. तर 7 कामगार गंभीर जखमी झाले असल्याची माहिती पोलिसांनी दिली.

दरम्यान, दुर्घटनेची माहिती मिळताच पिंपरी चिंचवडमधील अग्निशमन दल आणि पोलीस घटनास्थळी दाखल झाले आहेत. सध्या हा ढिगारा हटवून जखमींना बाहेर काढले जात आहे. तसेच सध्या जखमींना रुग्णालयात दाखल केले जात आहे. ज्या लेबर कॅम्प परिसरात ही घटना घडली त्या ठिकाणी 1 हजारहून अधिक कामगार वास्तव्यास आहेत. त्या पाण्याच्या टाकीखाली हे कामगार काम करत होते. त्या टाकीचे काम पूर्ण होऊन काही दिवस देखील झाले नव्हते. बांधकाम कच्च असल्याने ही टाकी पडली असावी, असा अंदाज वर्तवला जात आहे.