Gudi Padwa: गोदाकाठी नववर्षाचे जल्लोषी स्वागत, 100 महिलांनी साकारली महारांगोळी, काय आहे खास?

नाशिक: गुढीपाडवा हा सण संपूर्ण महाराष्ट्रात मोठ्या जल्लोषात साजरा केला जातो. आज मराठी नववर्षानिमित्त सर्वत्र उत्साह आहे. धार्मिक नगरी मानल्या जाणाऱ्या नाशिक शहरात देखील नववर्षाचं स्वागत वेगवेगळ्या कार्यक्रमांनी होतंय. शहरात पुण्यश्लोक अहिल्यादेवी होळकर यांच्या आयुष्यातील प्रेरणादायी प्रसंगांचे रांगोळी काढून चित्रण करण्यात आले आहे. पंचवटी परिसरातील गोदावरी काठावर तब्बल 20 हजार चौरस फुटांत ही महारांगोळी साकारली आहे.

नववर्षाच्या स्वागतानिमित्त नाशिक येथील हिंदू नववर्ष स्वागत महोत्सव समितीच्या वतीने गोदाकाठी महारांगोळी साकारली आहे. अहिल्यादेवींचे आठवे वंशज नानासाहेब होळकर यांच्या हस्ते रांगोळीचा पहिला ठिपका ठेवत उपक्रमाचा श्रीगणेशा केला. जवळपास 100 महिलांच्या योगदानातून ही महारांगोळी साकारण्यात आली आहे. अहिल्यादेवी यांच्या जन्माच्या त्रिशताब्दी वर्षानिमित्त कर्तृत्व, नेतृत्व व दातृत्व हे पैलू मुख्यतः रांगोळीत अधोरेखित करण्यात आले आहे.