Ganesh Temple : एकाच मंदिरात गणपतीची तीन रुपं, श्रीरामांशी आहे संबंध?

उज्जैन, 14 सप्टेंबर : आता केवळ काहीच दिवस, मग बाप्पा घरोघरी विराजमान होईल आणि भक्त उत्साहाने त्याचा पाहुणचार करतील. बाप्पाचं कोणतंही रूप मन प्रसन्न करतं. त्याचं प्रत्येक रूप साजिरं दिसतं. चिंतामण रूपात बाप्पा भक्तांच्या सर्व चिंता दूर करतो असं मानलं जातं, तर इच्छामन रूपात भक्तांच्या सर्व इच्छा पूर्ण करतो असं म्हटलं जातं. तसंच त्याच्या सिद्धिविनायक रुपामुळे भक्तांना सिद्धी प्राप्त होते, अशी मान्यता आहे.

मध्यप्रदेशच्या उज्जैन भागातील प्रसिद्ध महाकालेश्वर मंदिरापासून 6 किलोमीटर अंतरावर बाप्पाचं एक प्राचीन मंदिर आहे. चिंतामण गणेश नावाने या मंदिराची कीर्ती दूरदूरवर पसरली आहे. चिंतामण, इच्छामन आणि सिद्धिविनायक अशा तीनही रूपात या मंदिरात बाप्पा एकाच स्थानी विराजमान आहे. असं म्हणतात की, या मंदिराची स्थापना नवव्या ते तेराव्या शतकात झाली होती. मंदिराच्या शिखरावर सिहांचं रूप पाहायला मिळतं. पुण्यश्लोक अहिल्याबाई होळकर यांच्या कार्यकाळात या मंदिराचा जीर्णोद्धार झाला.