अयोध्येत घुमणार पिंपरी-चिंचवडचा ‘चौघडा’; ‘या’ व्यक्तीला विशेष निमंत्रण Video

सनई चौघडा हा मंगलकार्याचे प्रतीक. आजच्या डिजिटल युगात या वाद्याचा निनाद मोबाईल किंवा सीडीमध्ये जरी बंदिस्त झाला असला तरी आजही सनई चौघडा, ताशा, संबळ सारख्या मंगल वाद्यांचा सांस्कृतिक ठेवा पाचंगे कुटुंबाने जपला आहे. त्यामध्ये एक नाव प्रकर्षाने घ्यावे लागेल ते म्हणजे चौघडा सम्राट रमेश पाचंगे यांचे. पांचंगे कुटुंबात जयाजी पाचंगे यांनी ही परंपरा सुरू केली आणि आता त्यांचे नातू रमेश पाचंगे ही कला गेल्या 40 वर्षांपासून पुढे नेत आहेत.

जानेवारी 2021 मध्ये यापूर्वी झालेल्या विश्व मराठी ऑनलाइन संमेलनामध्ये सनई चौघडा सादरीकरणाचा मान त्यांना मिळाला होता. वयाच्या दहाव्या वर्षी हातात घेतलेल्या या वाद्याचे आजही तितक्याच साधनेने आणि तन्मयतेने ते वादन करताना दिसतात. ही कला पुढच्या पिढीमध्ये देखील जिवंत राहावी यासाठी शाळांमधील मुलांना या कलेचे शिक्षण देण्याबाबत त्यांनी आश्वासक पावले उचलली आहेत. आपल्या कलेवरील प्रभुत्वामुळे शहर आणि राज्यभरातील जवळपास 587 पुरस्कारांचे ते मानकरी ठरले आहेत. आता त्यांच्या कलेचा आस्वाद घरबसल्या घेण्याची संधी देशविदेशातील संगीत प्रेमींना मिळणार आहे.

विश्व मराठी ऑनलाइन संमेलनामध्ये 25 देश सहभागी झाले होते. त्यांच्यापर्यंत सनई चौघड्याचा निनाद पाचंगे यांनी पोहोचवला होता. त्यानंतर देहुमध्ये झालेल्या एका कार्यक्रमात पाचंगे यांनी पंतप्रधान नरेंद्र मोदी यांच्या समोर चौघडा वादन केले होते. शहरासह राज्यात झालेल्या अनेक मोठ्या सोहळ्यांमध्ये पाचंगे यांचे चौघडा वादन श्रवणीय ठरले आहे. त्यानंतर आता जगाचे लक्ष लागलेल्या अयोध्येतील श्रीराम मंदिराच्या लोकार्पण सोहळ्याकरता बोलावणे म्हणजे, एकप्रकारे कलेला मिळालेला सन्मान असल्याची भावना चौघडा सम्राट रमेश पाचंगे यांनी बोलताना व्यक्त केली.