हातात मारुतीरायाचा झेंडा, अंगात बुरखा; त्या पायी निघाल्या अयोध्येला!

मुंबईच्या रहिवासी असलेल्या शबनम शेख यांनी रमन शर्मा आणि विनीत पांडे या आपल्या सहकाऱ्यांसह या प्रवासाला सुरूवात केली. 31 डिसेंबरला त्या मध्य प्रदेशच्या इंदोरमधील मानपूर भागात दाखल झाल्या. तेव्हा मां वैष्णो देवी सेवा समितीकडून त्यांचं भव्य स्वागत करण्यात आलं. समिती सदस्यांच्या आग्रहाखातर शबनम या मंदिरातील हवनमध्ये आनंदाने सहभागी झाल्या. त्यावेळी 30 मिनिटे हनुमान चालीसेचं पठणही करण्यात आलं. त्यानंतर त्या जेव्हा पुढील प्रवासाला निघाल्या तेव्हा मंदिर परिसर 'भारत माता की जय, वंदे मातरम, नारी शक्ती जिंदाबाद' या घोषणांनी दुमदुमून निघाला.  तर, 'मंदिरात मिळालेली सकारात्मक ऊर्जा मला अयोध्येपर्यंतच्या प्रवासात उपयुक्त ठरेल', असं शबनम म्हणाल्या.

शबनम यांनी सांगितलं की, या प्रवासाची 21 डिसेंबरला सुरूवात केली. अयोध्येच्या श्रीराम मंदिरात पायी जायचं आधीच ठरलं होतं, परंतु त्यासाठी एवढं संरक्षण मिळेल याचा विचारही केला नव्हता. या प्रवासात पोलिसांकडून चांगलं सहकार्य मिळतंय. पावला-पावलावर लोक आमच्यासोबत जोडले जात आहेत. आम्हाला कोणत्याही प्रकारची अडचण येत नाहीये, प्रवास अगदी सुरळीत सुरू आहे. विशेष म्हणजे शबनम म्हणाल्या की, त्यांचा जन्म जरी मुस्लिम कुटुंबात झाला असला तरी त्यांच्या घरी रामायण आणि गीतेचं पठण होतं.