170000000 रुपयांचा फटका, हेडची स्टंटबाजी अंगाशी, क्रिकेट ऑस्ट्रेलिया 2 दिवसांमध्येच कंगाल!

ऑस्ट्रेलियाने ऍशेस सीरिजची पहिली मॅच 8 विकेटने जिंकली. चौथ्या इनिंगमध्ये ट्रॅविस हेडने 83 बॉलमध्ये 123 रनची खेळी केली, ज्यात 16 फोर आणि 4 सिक्सचा समावेश होता. पण ट्रॅविस हेडच्या या खेळीमुळे क्रिकेट ऑस्ट्रेलियाचं तब्बल 17.35 कोटी रुपयांचं नुकसान झालं आहे. दोनच दिवसांमध्ये मॅच संपल्यामुळे क्रिकेट ऑस्ट्रेलियाला याचा मोठा फटका बसला आहे. या सामन्याच्या तिसऱ्या, चौथ्या आणि पाचव्या दिवसाची तिकीटं आधीच विकली गेली होती, पण मॅचचा निकाल दोनच दिवसांमध्ये लागल्यामुळे क्रिकेट ऑस्ट्रेलियाला प्रेक्षकांना रिफंड द्यावा लागला आहे.

ऑस्ट्रेलिया आणि इंग्लंड यांच्यातल्या पहिल्या टेस्ट मॅचच्या पहिल्या दिवशी प्रेक्षक संख्येची सगळी रेकॉर्ड तुटली. मॅचच्या पहिल्या दिवशी जवळपास 51,531 प्रेक्षक उपस्थित होते. तर दुसऱ्या दिवशी प्रेक्षक संख्या 49,983 एवढी होती. मॅचच्या तिसऱ्या आणि चौथ्या दिवशीही तेवढ्याच प्रेक्षक संख्येची अपेक्षा होती, ज्यामुळे क्रिकेट ऑस्ट्रेलियाला तिकीट विक्रीतून मोठा नफा झाला असता, पण मिचेल स्टार्क आणि ट्रॅविस हेडच्या कामगिरीमुळे मॅचचा निकाल दोनच दिवसांमध्ये लागला.

ऑस्ट्रेलियाला शेवटच्या इनिंगमध्ये विजयासाठी 205 रनची गरज होती. पर्थची धोकादायक खेळपट्टी पाहता ऑस्ट्रेलियाला हा सामना जिंकणं कठीण होईल, असं वाटत होतं. पण हेडच्या वादळी खेळीमुळे ऑस्ट्रेलियाने हा सामना अगदी सहज जिंकला. हेडने फक्त 69 बॉलमध्ये त्याचं शतक पूर्ण केलं.

ट्रॅविस हेडने मॅच संपल्यानंतर चाहत्यांची माफीही मागितली, ज्यांनी रविवारसाठी तिकीट बूक केली होती. 'ज्यांना उद्या येता येणार नाही, त्यांचं मला वाईट वाटलं. मला वाटतं उद्या पूर्ण स्टेडियम भरलं असतं', असं हेड मॅच संपल्यानंतर सेव्हन नेटवर्कसोबत बोलताना म्हणाला.

ऑस्ट्रेलिया आणि इंग्लंड यांच्यात पर्थमध्ये झालेल्या पहिल्या टेस्टच्या पहिल्याच दिवशी 19 विकेट गेल्या होत्या. मिचेल स्टार्कने पहिल्या दिवशी 7 विकेट घेतल्या. तर सामन्यामध्ये 2 दिवसांमध्ये 32 विकेट गेल्या आणि मॅचचा निकाल फक्त 13 तासांमध्येच लागला, त्यामुळे या सामन्याची चर्चा जोरात झाली.