IND vs NZ : आयुष बदोनी टीममध्ये, पण बेंचवरच बसणार, दुसऱ्या वनडेच्या Playing XI मध्ये भलत्यालाच संधी!

टीम इंडियामध्ये स्थान मिळवूनही, दिल्लीचा कर्णधार आयुष बदोनीला त्याच्या आंतरराष्ट्रीय पदार्पणाची वाट पहावी लागेल. या सामन्यासाठी ऑलराऊंडर असलेल्या बदोनीचा प्लेइंग इलेव्हनमध्ये समावेश होण्याची शक्यता कमी आहे. असे वृत्त आहे की टीम मॅनेजमेंट बदोनीपेक्षा तरुण ऑलराऊंडर नितीश कुमार रेड्डीला प्राधान्य देईल आणि तो दुसऱ्या वनडे सामन्यात खेळताना दिसेल. नितीश आधीच वनडे टीमचा भाग होता, पण त्याला बडोदा वनडे सामन्यात खेळण्याची संधी मिळाली नाही.

2024 मध्ये तिन्ही फॉरमॅटमध्ये टीम इंडियासाठी पदार्पण करणारा आंध्र प्रदेशचा नितीश रेड्डी शेवटचा सामना ऑस्ट्रेलिया दौऱ्यात खेळला होता. रेड्डी अॅडलेडमधील दुसऱ्या वनडे सामन्यात प्लेइंग इलेव्हनचा भाग होता. पण, दुखापतीमुळे तो दक्षिण आफ्रिकेविरुद्धच्या वनडे सीरिजमध्ये खेळू शकला नाही. आता त्याला या सीरिजसाठी टीम इंडियामध्ये स्थान देण्यात आले आहे. दोन खेळाडूंना झालेल्या दुखापतींमुळे त्याला प्लेइंग इलेव्हनमध्ये सामील होण्याचे दरवाजे उघडले आहेत. सामन्याच्या एक दिवस आधी दुखापतीमुळे ऋषभ पंतला बाहेर ठेवण्यात आले होते, तर सुंदरला सामन्यादरम्यान दुखापत झाली होती.

वनडे सीरिजमधील दुसरा सामना 14 जानेवारी रोजी राजकोटमध्ये खेळला जाईल. हा सामना निरंजन शाह स्टेडियमवर होणार आहे, जिथे टीम इंडियाने आतापर्यंत चार वनडे सामने खेळले आहेत, ज्यामध्ये फक्त एक जिंकला आहे आणि तीन गमावले आहेत. रनबद्दल बोलायचे झाले तर, विराट कोहलीचं या मैदानातील रेकॉर्ड सर्वोत्तम आहे. येथे खेळल्या गेलेल्या चार सामन्यांमध्ये त्याने 56.50 च्या सरासरीने सर्वाधिक रन केल्या आहेत, ज्यामध्ये तीन अर्धशतके आहेत. पण, त्याने या मैदानात एकही शतक केलेले नाही. कोहलीचा सध्याचा फॉर्म पाहता, त्याचा या मैदानातील शतकांचा दुष्काळ संपेल अशी आशा आहे.