Rishabh Pant IPL 2025: 27 कोटींचे वाटोळे, 27 धावा करता येईना; पंत मैदानावर उतरला की ठरतोय संघासाठी ओझं

एक फलंदाज तो असतो जो गोलंदाजाच्या कौशल्याने बाद होतो आणि काही फलंदाज असे असतात जे स्वतःहून आपली विकेट फेकून देतात. तर तिसऱ्या प्रकारचे फलंदाज असे असतात जे वारंवार एकसारखी चूक करतात आणि  कोणत्याही पश्चातापाशिवाय पॅव्हेलियनमध्ये परततात. पंत काहीसा याच प्रकारात येतो.

दिल्लीविरुद्धच्या सामन्यात ऋषभने 5 चेंडू निर्धाव खेळल्यानंतर सहाव्या षटकातील कुलदीपच्या चेंडूवर उभा राहून हवेत फटका मारला आणि बाद झाला. सनरायझर्सविरुद्धच्या सामन्यात पंतने 14 चेंडू खेळल्यानंतर 15 व्या षटकातील हर्षल पटेलच्या चेंडूवर स्वीप मारण्याच्या प्रयत्नात पुन्हा हवेत झेलबाद झाला आणि पंजाब किंग्जविरुद्धच्या सामन्यात 4 चेंडूत 2 धावा काढल्यानंतर पाचव्या षटकातील मॅक्सवेलच्या चेंडूवर पुन्हा स्वीप शॉट खेळून शॉर्ट फाइन लेगवर झेलबाद झाला. पंत इतक्या वाईट फॉर्ममधून जात आहे की, त्याने तीन डावांमध्ये 26 चेंडूत केवळ 20 धावा केल्या आहेत.

फलंदाजीत वाईट दिवस असू शकतो पण कर्णधारपद आणि यष्टीरक्षणामध्येही ऋषभ पंतची अवस्था बिकट आहे. पहिल्या सामन्यात शार्दुल ठाकूरला गोलंदाजी न देणे, शेवटच्या षटकात स्टंपिंग सोडणे आणि महत्त्वाच्या क्षणी गडबडणे,  अशा चुका पंतने केल्या आहेत.