MS Dhoni : थाला फॅन्सला 'जोर का झटका', महेंद्रसिंग धोनी पहिले दोन आठवडे IPL 2026 मधून 'आऊट'

महेंद्रसिंग धोनी आयपीएल 2026 चे पहिले दोन आठवडे मुकण्याची शक्यता आहे, असं चेन्नई सुपर किंग्जने शनिवारी सांगितलं. "एम.एस. धोनी सध्या पोटरीच्या स्नायूंच्या दुखापतीवर पुनर्वसन उपचार घेत आहे. परिणामी, तो आयपीएल 2026 चे पहिले दोन आठवडे मुकण्याची शक्यता आहे," असं या फ्रँचायझीने सोशल मीडियावर सांगितलं आहे. सोमवारी होणाऱ्या आपल्या सलामीच्या सामन्यात चेन्नईचा सामना राजस्थान रॉयल्सशी होणार आहे.

पहिल्या दोन आठवड्यांच्या कालावधीत, CSK चे सामने 30मार्च रोजी गुवाहाटी येथे राजस्थान रॉयल्सविरुद्ध, 3 एप्रिल रोजी चेन्नई येथे पंजाब किंग्सविरुद्ध, 5 एप्रिल रोजी बंगळुरू येथे रॉयल चॅलेंजर्स बंगळुरूविरुद्ध आणि 11 एप्रिल रोजी चेन्नई येथे दिल्ली कॅपिटल्सविरुद्ध नियोजित आहेत. यानंतर, 14 एप्रिल रोजी चेन्नई येथे चेन्नईचा सामना कोलकाता नाईट रायडर्सशी होणार आहे. धोनीचे पुनरागमन कदाचित दिल्लीविरुद्धच्या सामन्यात किंवा त्यानंतरच्या कोलकाताविरुद्धच्या सामन्यात होण्याची शक्यता आहे.

चेन्नई सुपर किंग्जला गेल्या काही वर्षात योग्य रिप्लेसमेंट खेळाडूची गरज भासत होती. मात्र आता संजू सॅमसनला 18 कोटीमध्ये खरेदी केल्यानंतर धोनी निवृत्ती घेण्याच्या तयारीत आहे. यंदाचा आयपीएल हंगाम त्याच्यासाठी शेवटचा असू शकतो. धोनी यंदाच्या हंगामात काही सामने खेळेल, अशी शक्यता देखील आहे. 44 वर्षांचा धोनी महत्त्वाच्या सामन्यात तरी खेळणार का? असा सवाल विचारला जात आहे.