Mrunal Thakur : मराठमोळी मृणाल ठाकूर प्रेमाच्या विकेटवर क्लीन बोल्ड! टीम इंडियाच्या स्टारसोबत 'सिक्रेट डेट'

मृणाल ठाकूर आणि भारताच्या वनडे टीमचा उपकर्णधार श्रेयस अय्यर मागच्या काही महिन्यांपासून एकमेकांना डेट करत असल्याचा दावा एका रेडिट यूजरने केला आहे. श्रेयस अय्यर आणि मृणाल ठाकूर हे त्यांच्या खासगी आणि स्पेशल नात्यातल्या सुरूवातीच्या टप्प्यात असल्याचं या रेडिट यूजरने सांगितलं आहे, तसंच मृणाल आणि श्रेयस त्यांचं हे नातं अत्यंत गुप्त ठेवू इच्छित असल्याचा दावाही रेडिट यूजरने केला आहे.

श्रेयस अय्यर आणि मृणाल ठाकूर हे दोघं त्यांच्या करिअरच्या सर्वोच्च टप्प्यावर आहेत, तसंच दोघांचा चाहता वर्गही मोठा आहे. या अफवा खऱ्या असतील तर मीडियाचं लक्ष त्यांच्या नात्यावर येऊन अनावश्यक दबाव येऊ नये, म्हणून हे दोघंही सार्वजनिक ठिकाणी एकत्र दिसणंही टाळत असल्याचं वृत्त आहे. सार्वजनिक ठिकाणी एकत्र दिसण्याऐवजी दोघेही जवळच्या मित्रांच्या किंवा एकमेकांच्या घरी भेटतात, असा दावाही रेडिटवर करण्यात आला आहे. श्रेयस अय्यर किंवा मृणाल ठाकूर या दोघांनीही या दाव्याची पुष्टी केलेली नाही. आतापर्यंत फक्त सोशल मीडियावरच दोघांच्या रिलेशनशीपचे दावे केले जात आहेत.

ऑस्ट्रेलिया दौऱ्यातल्या वनडे सीरिजदरम्यान श्रेयस अय्यरला गंभीर दुखापत झाली होती, यानंतर त्याला ऑस्ट्रेलियामधल्याच रुग्णालयात आयसीयूमध्ये ठेवण्यात आलं होतं. या दुखापतीतून श्रेयस अय्यर बरा होत आहे, पण पूर्णपणे फिट झाला नसल्यामुळे त्याची दक्षिण आफ्रिकेविरुद्धच्या वनडे सीरिजसाठी टीममध्ये निवड झाली नाही.

मृणाल ठाकूर ही सध्या बॉलिवूडमधील टॉपच्या अभिनेत्रींपैकी एक आहे. 33 वर्षांच्या मृणालने जळगाव आणि मुंबईमध्ये तिचं शिक्षण पूर्ण केलं, त्यानंतर ती पहिल्यांदा कुमकुम भाग्य या टीव्ही सीरियलमधून लोकप्रिय झाली. विटी दांडू (2014) या मराठी चित्रपटातून मृणाल ठाकूरने मोठ्या पडद्यावर पदार्पण केलं. लव्ह सोनिया (2018) हा तिचा पहिला बॉलिवूड चित्रपट होता. मृणालने सुपर 30, बाटला हाऊस तसंच तेलुगू हिट सीता रामम या चित्रपटांमध्ये भूमिका केली.