17 तासांमध्ये दुसरा पराभव, पाकिस्तान परत तोंडावर आपटलं, टीम इंडियाने पुन्हा 'औकात' दाखवून दिली!

कोलंबोपासून हजारो मैल दूर दुबईमध्ये रविवार 21 सप्टेंबर रोजी रात्री 12 वाजता, भारतीय क्रिकेट टीमने आशिया कप 2025 च्या सुपर फोर सामन्यात पाकिस्तानचा 6 विकेट्सने पराभव केला. या विजयानंतर अवघ्या 17 तासांत, सोमवार, 22 सप्टेंबर रोजी, भारताच्या युवा फुटबॉल स्टार्सनी पाकिस्तानला धक्का दिला. आशिया कपप्रमाणेच SAFF चॅम्पियनशिपमध्ये भारत आणि पाकिस्तान एकाच गटात होते आणि त्यांच्यातल्या ग्रुप स्टेजमधील सामन्याचा निकाल क्रिकेटसारखाच होता.

ग्रुप बी च्या या सामन्यात, भारतीय टीमने पाकिस्तानचा 3-2 असा पराभव केला आणि तिन्ही सामने जिंकून त्यांच्या गटात पहिले स्थान मिळवले. टीम इंडियाने सामन्यात गोलची सुरुवात केली, 31 व्या मिनिटाला डल्लामुओ गंगटेने गोल करून त्यांना 1-0 अशी आघाडी मिळवून दिली. पण, 43 व्या मिनिटाला मुहम्मद अब्दुल्लाहने पेनल्टीवर गोल करून पाकिस्तानला बरोबरी करून दिली. दुसऱ्या हाफमध्ये टीम इंडियाने पुन्हा आघाडी घेतली, 63 व्या मिनिटाला गुनलिबा वांगखेरकपमने गोल करून भारताला 2-1 अशी आघाडी मिळवून दिली.

पण पाकिस्तानने परत झुंज दिली, 70 व्या मिनिटाला हमजा यासिरने त्यांचा दुसरा गोल केला. पाकिस्तानची ही बरोबरी जास्त काळ टिकली नाही आणि अवघ्या तीन मिनिटांनी, भारताने सामन्यात तिसऱ्यांदा आघाडी घेतली. यावेळी, रेहान अहमदने 73 व्या मिनिटाला गोल करून 3-2 अशी आघाडी घेतली. यानंतर, भारतीय टीमने पाकिस्तानला बरोबरीची एकही संधी दिली नाही. अशा प्रकारे, टीम इंडियाने त्यांच्या गटातील तिन्ही सामने जिंकले.

भारतीय टीम आधीच सेमीफायनलमध्ये पोहोचली होती, तर पाकिस्तानने या पराभवानंतरही सेमीफायनलमध्ये प्रवेश केला. आता सेमीफायनलमध्ये भारतीय टीमचा सामना नेपाळशी होईल, तर पाकिस्तानचा सामना बांगलादेशविरुद्ध होईल. भारतीय टीमने ही स्पर्धा सर्वाधिक सहा वेळा, तर पाकिस्तानने फक्त एकदाच जिंकली आहे. टीम इंडिया गेल्या वर्षीची विजेता होती आणि आता सातव्यांदा विजेतेपद जिंकण्याच्या जवळ आहे.