पोरींनी मायानगरीत वर्ल्ड कप जिंकला, पण 5 दिग्गज असूनही मुंबईची वाईट अवस्था, स्कोअरबोर्ड पाहून तुम्हालाही वाईट वाटेल!

राजस्थानविरुद्धच्या रणजी ट्रॉफीच्या सामन्यात मुंबईची अवस्था बिकट झाली आहे. राजस्थानने या सामन्यात टॉस जिंकून पहिले बॉलिंगचा निर्णय घेतल्यानंतर मुंबईचा पहिल्या इनिंगमध्ये 254 रनवर ऑलआऊट झाला, त्यानंतर राजस्थानने 617/6 रवरन डाव घोषित केला. तिसऱ्या दिवसाचा खेळ संपला तेव्हा मुंबईचा स्कोअर 89/0 एवढा झाला आहे, त्यामुळे मुंबई अजून 274 रननी पिछाडीवर आहे. यशस्वी जयस्वाल 56 रनवर आणि मुशीर खान 32 रनवर खेळत आहेत. मुंबईच्या टीममध्ये यशस्वी जयस्वाल, अजिंक्य रहाणे, सरफराज खान, शार्दुल ठाकूर आणि तुषार देशपांडे हे पाच दिग्गज खेळाडू असूनही मुंबईला संघर्ष करावा लागला आहे.

पहिले बॅटिंग करताना मुंबईकडून जयस्वालने 67 आणि मुशीर खानने 49 रन केले, पण त्यानंतर मुंबईची बॅटिंग गडगडली आणि 254 रनवर मुंबईचा ऑलआऊट झाला. यानंतर बॅटिंगला आलेल्या राजस्थानने 617 रनचा डोंगर उभारला. दीपक हुड्डाने 218 रन तर कार्तिक शर्माने 139 रनची खेळी केली, याशिवाय सचिन यादवनेही 92 रन केले. मुंबईकडून शम्स मुलानी आणि तुषार देशपांडेला 2-2 विकेट मिळाल्या, तर जयस्वालनेही एक विकेट घेतली.

रणजी ट्रॉफीच्या या मोसमात मुंबईने जम्मू-काश्मीरविरुद्धचा पहिला सामना 35 रननी जिंकला, त्यानंतर छत्तीसगडविरुद्धचा सामना मुंबईने ड्रॉ केला, आता राजस्थानविरुद्धच्या सामन्यात पराभव टाळण्यासाठी मुंबईला उद्या दिवसभर बॅटिंग करावी लागणार आहे.