Team India : 'काही तर्क नाही, बॅटिंगमध्ये मनमानी प्रयोग...', गंभीरच्या रणनीतीवर रवी शास्त्रींचा संताप अनावर!

गुवाहाटी : दक्षिण आफ्रिकेविरुद्धची पहिली टेस्ट गमावल्यानंतर आता टीम इंडिया दुसऱ्या टेस्ट मॅचमध्येही पराभवाच्या छायेत आहे, त्यामुळे टीम इंडियाचा मुख्य प्रशिक्षक गौतम गंभीरच्या रणनीतीवर प्रश्नचिन्ह उपस्थित केलं जात आहे. टीम इंडियाचे माजी प्रशिक्षक रवी शास्त्री यांनी सध्याच्या भारतीय प्रशिक्षकांवर जोरदार टीका केली आहे. टीम इंडियाच्या सगळ्यात यशस्वी प्रशिक्षक असलेल्या रवी शास्त्रींनी गंभीरच्या निर्णयांवर निशाणा साधला आहे. गंभीरच्या निर्णयांना समजून घेण्याचा प्रयत्न केला, तरीही त्यात कोणतेही तर्क सापडत नाहीत, असं शास्त्री म्हणाले आहेत. टीमच्या बॅटिंगचा क्रम आणि ऑलराऊंडर खेळाडूंवर अवलंबून राहण्याच्या रणनीतीने आपल्याला धक्का बसला आहे, अशी प्रतिक्रिया शास्त्रींनी दिली आहे.