T20 World Cup 2024 : न्यूयॉर्कमध्ये रंगणार भारत-पाकिस्तान हाय व्होल्टेज लढत; पाऊस व्हिलन ठरला तर..?

नवी दिल्ली : भारत आणि पाकिस्तानच्या क्रिकेट टीम्स रविवारी (9 जून) न्यूयॉर्कमध्ये पुन्हा एकदा समोरासमोर येणार आहेत. टी 20 वर्ल्ड कप 2024मधली ही हाय व्होल्टेज लढत भारतीय प्रमाणवेळेनुसार रात्री आठ वाजता सुरू होईल. या मॅचला हवामानाचा फटका बसण्याची शक्यता आहे. टीम इंडियाने पहिल्याच मॅचमध्ये आयर्लंडचा पराभव करून आपल्या वर्ल्ड कप मोहिमेची चांगली सुरुवात केली आहे, तर पाकिस्तानला पहिल्याच मॅचमध्ये पराभवाचा सामना करावा लागला. टीम इंडिया पाकिस्तानला पराभूत करून आणि सलग दुसरा विजय नोंदवून सुपर एटसाठी आपला दावा मजबूत करण्यास उत्सुक आहे. पाकिस्तानदेखील विजयाच्या हेतूने मैदानात उतरेल आणि सुपर एटच्या शर्यतीत टिकून राहण्याचा प्रयत्न करील. अॅक्युवेदर डॉट कॉम या हवामानविषयक वेबसाइटने दिलेल्या माहितीनुसार, भारत-पाकिस्तान मॅचच्या दिवशी पाऊस पडण्याची शक्यता आहे.