Pakistan : 'फालतूगिरी चालणार नाही, चालता हो...', पाकिस्तानच्या कोच-कॅप्टनची जुंपली, डग आऊटमध्ये राडा, Video

भारताविरुद्ध 61 रननी पराभव झाल्यानंतर पाकिस्तानला नामिबियाविरुद्धच्या सामन्यात विजय मिळवणं गरजेचं होतं. नामिबियाविरुद्धच्या सामन्यात पाकिस्तानने विजय मिळवला असला तरी त्यांच्या ड्रेसिंग रूममध्ये सगळं काही आलबेल नसल्याचं चित्र आहे. पाकिस्तान-नामिबिया यांच्यातल्या सामन्या दरम्यान पाकिस्तानच्या डग आऊट मधला एक व्हिडिओ समोर आला आहे.

पाकिस्तानच्या बॅटिंगची 14 वी ओव्हर सुरू असताना डग आऊटमध्ये कर्णधार सलमान अली आघाने त्याच्या हातात असलेली बॉटल रागाने फेकली, तेव्हा पाकिस्तानचे प्रशिक्षक माईक हेसन हे संतापले आणि सलमान आघाला पाहून काहीतरी म्हणाले, पण त्यांच्या चेहऱ्यावरचा राग हा स्पष्टपणे दिसत होता. सलमान आघा बॉटल फेकताना त्याच्या बाजूला बाबर आझम बसला होता.

या सामन्यामध्ये पाकिस्तानने बाबर आझमला टीममध्ये घेतलं, पण त्याला बॅटिंगलाच पाठवलं नाही. पाकिस्तानकडून साहिबझादा फरहान आणि सॅम अयुब ओपनिंगला आले, तर तिसऱ्या क्रमांकावर सलमान आघा, चौथ्या क्रमांकावर ख्वाजा नाफे आणि पाचव्या क्रमांकावर शादाब खान बॅटिंगला उतरला. भारताविरुद्धच्या सामन्यात बाबर आझम खराब शॉट खेळून आऊट झाला, त्याचीच शिक्षा म्हणून नामिबियाविरुद्धच्या सामन्यात त्याला प्लेइंग इलेव्हनमध्ये घेऊनही बॅटिंगला पाठवलं नसल्याची चर्चा रंगली आहे.

नामिबियाविरुद्ध विजय मिळवताच पाकिस्तानचा सुपर-8 मध्ये प्रवेश झाला आहे. सुपर-8 मध्ये पाकिस्तानच्या ग्रुपमध्ये न्यूझीलंड, इंग्लंड आणि श्रीलंकेची टीम आहे. सेमी फायनलला प्रवेश करण्यासाठी पाकिस्तानला या 3 पैकी कमीत कमी 2 मॅच तरी जिंकाव्या लागणार आहेत.