Asian Games : ठाण्याच्या रुद्राक्षचा एशियन गेम्समध्ये सुवर्णवेध, भारतीय संघाचं ऑलिम्पिक तिकिटही निश्चित

रुद्राक्ष पाटील ठाण्याचा असून त्याने एशियन गेम्समध्ये ऐश्वर्य प्रताप सिंग आणि दिव्यांश सिंग पानवार यांच्यासोबत सुवर्णपदकावर नाव कोरलं.  रुद्राक्ष पाटील आणि संघाने केलेल्या या कामगिरीमुळे पॅरीस येथे होणाऱ्या ॲालिम्पिक २०२४ मध्ये भारताचे स्थान पक्के झाले आहे. तिघांनी वैयक्तिक क्वालिफिकेशन राउंडमध्ये १८९३.७ गुण मिळवले. यासोबतच तिघांनी बाकू वर्ल्ड चॅम्पियनशिपमध्ये चीनने केलेला याआधीचा विश्वविक्रमही मोडला.

शूटिंगशिवाय रोइंगमध्येही आज भारताने एक पदक पटकावलं. रोइंगच्या मेन्स कॉक्सलेस फोर स्पर्धेत जसविंदर सिंह, आशिष, पुनीत कुमार आणि भीम सिंह यांनी कांस्य पदक पटकावलं. भारताने आतापर्यंत सात पदके जिंकली असून यात रोइंगमध्ये चार तर शूटिंगमध्ये तीन पदके मिळाली आहेत.

चीनच्या हांगझोऊ इथं एशियन गेम्स स्पर्धा सुरू असून सोमवारी स्पर्धेचा दुसरा दिवस आहे. पहिल्या दिवशी भारताने पाच पदके पटकावली आहेत. आज दोन पदके पटकावली असून क्रिकेटमध्ये भारताच्या महिला संघाला सुवर्ण पदक जिंकण्याची संधी आहे.