Thane News: 16 वर्षांची लाडकी लेक, 14 व्या मजल्यावर गेली अन् एका क्षणात सगळं संपलं; ठाण्यातील दुर्दैवी घटना

मिळालेल्या माहितीनुसार, मृत तरुणी आपल्या कुटुंबासोबत शुभ संकेत सोसायटीत राहत होती. सोमवारी दुपारच्या सुमारास तिने अचानक इमारतीच्या 14व्या मजल्यावरून उडी घेतली. तिच्या कुटुंबीयांना आणि शेजाऱ्यांना ही बाब लक्षात येताच तिला तातडीने जवळच्या रुग्णालयात दाखल करण्यात आले. मात्र, डॉक्टरांनी तपासणीनंतर तिला मृत घोषित केले.

घटनेची माहिती मिळताच कासारवडवली पोलिसांनी घटनास्थळी धाव घेतली. या प्रकरणी आकस्मिक मृत्यूची नोंद करण्यात आली असून आत्महत्येमागील नेमके कारण शोधण्यासाठी पोलिस तपास करत आहेत. प्राथमिक माहितीनुसार ती काही दिवसांपासून मानसिक तणावात असल्याची शक्यता व्यक्त केली जात आहे.