‘तो’ काळ बनून आला, पण चिमुकलीनं डेअरिंग केलं, नराधमाच्या तावडीतून मैत्रिणीला वाचवलं, कसं?

मिळालेल्या माहितीनुसार, 6 फेब्रुवारी रोजी पीडित मुलगी क्लाससाठी जात असताना रस्त्यात एका रिक्षाचालकाने तिला अडवले आणि तिच्याशी गैरवर्तन केले. त्या वेळी तिच्यासोबत असलेल्या मैत्रिणीने प्रसंगावधान राखत तातडीने धाडस दाखवले. मैत्रीण अडचणीत असल्याचे लक्षात येताच तिने रिक्षाचालकाच्या डोळ्यात माती फेकली. त्यामुळे आरोपी काही क्षण गोंधळला आणि त्या संधीचा फायदा घेत दोन्ही मुलींनी तेथून सुरक्षितपणे पळ काढला. तिच्या या सतर्कतेमुळे मोठी दुर्घटना टळली.

घटनेनंतर पीडित मुलीच्या कुटुंबीयांनी बदलापूर पूर्व पोलिस ठाण्यात तक्रार दाखल केली. त्यानंतर पोलिसांनी तांत्रिक तपास करत परिसरातील अनेक सीसीटीव्ही फुटेज तपासले. तपासादरम्यान आरोपीची ओळख पटवण्यात पोलिसांना यश आले. आरोपी रिक्षाचालक अंबरनाथ परिसरात राहत असल्याचे समोर आल्यानंतर पोलिसांनी त्याला काही तासांतच अटक केली.

या प्रकरणाबाबत माहिती देताना पोलिस निरीक्षक राजेश गज्जल यांनी सांगितले की, घटनेची माहिती मिळाल्यानंतर आरोपीचा शोध घेणे सुरुवातीला अवघड जात होते. मात्र तांत्रिक तपास आणि सीसीटीव्ही फुटेजच्या आधारे आरोपीपर्यंत पोहोचण्यात पोलिसांना यश आले आहे.