Israel-Iran युद्धात नवा ट्विस्ट, गुप्त विमानांनी वाढवली खळबळ; अमेरिकेला समजेना, चीनचा वेगळाच डाव

FlightRadar24 च्या डेटानुसार, 14 जूनपासून आतापर्यंत किमान पाच बोईंग 747 विमानांनी चीनहून इराणकडे उड्डाण केलं आहे. ही विमानं चीनच्या उत्तर भागातून पश्चिमेकडे उड्डाण करत कझाकिस्तान, उझबेकिस्तान आणि तुर्कमेनिस्तान पार करताच इराणच्या सीमेवर पोहोचल्यावर रडारवरून गायब झाली. रिपोर्ट्सनुसार या विमानांचं अंतिम ठिकाण लक्झेंबर्ग दाखवण्यात आलं होतं. पण एकही विमान युरोपीय हवाई क्षेत्रात प्रवेश करताना दिसलेलं नाही. यामुळे या उड्डाणांच्या हेतूबाबत अधिक संशय निर्माण झाला आहे.

हेरिटेज फाउंडेशनच्या सेंटर फॉर नॅशनल डिफेन्सचे संचालक रॉबर्ट ग्रीनवे यांचं म्हणणं आहे की, चीन आपल्या आर्थिक आणि लष्करी महत्त्वाकांक्षांसाठी मध्य पूर्वेतून स्वस्त, निर्बंधित तेल खरेदी करत असतो आणि इराण त्याच्यासाठी एक महत्त्वाचा भागीदार आहे. त्यांच्या मते ही उड्डाणं कदाचित इराणकडून त्याचे महत्त्वाचे स्रोत, लोक किंवा सामरिक साहित्य चीनच्या मदतीने कुठे तरी हलवण्याचा प्रयत्न असू शकतात.

या ठिकाणी हे लक्षात घेणे गरजेचे आहे की- 2021 मध्ये तेहरान आणि बीजिंगने 25 वर्षांच्या धोरणात्मक सहकार्य करारावर स्वाक्षऱ्या केल्या होत्या. फॉक्स न्यूजच्या रिपोर्टनुसार, तेहरान विद्यापीठाचे प्राध्यापक मोहम्मद मरांदी यांचं म्हणणं आहे की, ही भागीदारी अमेरिकासाठी एक स्पष्ट संदेश आहे. जितकं अमेरिका इराण आणि चीन यांना वेगळं ठेवण्याचा प्रयत्न करेल. तितकंच हे दोन्ही देश एकमेकांच्या अधिक जवळ येतील.