कोण होत्या मनसुरेह खोजस्तेह बाघेरझादेह? खामेनेईंच्या सर्वात जवळच्या व्यक्ती, आयुष्यभर दिली साथ

Published by:Jaykrishna Nair

Last Updated:Mar 02, 2026 7:54 PM IST

Mansoureh Khojasteh Bagherzadeh: इराणचे दिवंगत सर्वोच्च नेते अयातुल्ला अली खामेनेई यांच्या पत्नी मनसुरेह खोजस्तेह बाघेरझादेह यांचे अमेरिकन-इस्रायली संयुक्त हल्ल्यानंतर जखमी अवस्थेत निधन झाले. या घटनेनंतर इराणने सूडाची शपथ घेत पश्चिम आशियातील तणाव आणखी वाढवला आहे.

इम्पॅक्ट शॉटतुमचा गेटवे लेटेस्ट न्यूज

तेहरान: इराणचे दिवंगत सर्वोच्च नेते अयातुल्ला अली खामेनेई यांच्या पत्नी मनसुरेह खोजस्तेह बाघेरझादेह यांचे सोमवारी निधन झाले. अमेरिकेने आणि इस्रायलने तेहरानमध्ये केलेल्या संयुक्त हल्ल्यात त्या जखमी झाल्या होत्या. इराणी माध्यमांच्या अहवालानुसार जखमांमुळे काही दिवस उपचार सुरू असताना त्यांची प्रकृती खालावली आणि अखेर त्यांचे निधन झाले.

79 वर्षीय मनसुरेह यांचा जन्म इराणमधील मशहद येथे झाला होता. त्या इराणच्या सरकारी प्रसारमाध्यम संस्थेचे (Islamic Republic of Iran Broadcasting - IRIB) माजी उपसंचालक हसन खोजस्ते बाघेरझादेह यांच्या भगिनी होत्या. अमेरिकन-इस्रायली संयुक्त कारवाईच्या वेळी त्या तेहरानमधील निवासस्थानी खामेनेई यांच्यासोबत उपस्थित होत्या असे वृत्त आहे.

अली खामेनेई आणि मनसुरेह यांचा विवाह 1964 साली झाला होता. त्यांना सहा अपत्ये आहेत. चार पुत्र (मोस्तफा, मोजतबा, मसूद आणि मेयसम) तसेच दोन कन्या (होदा आणि बश्रा).

सूडाची शपथ, तणाव शिगेला

खामेनेई यांच्या मृत्यूनंतर पश्चिम आशियातील परिस्थिती अधिकच तणावपूर्ण बनली आहे. इराणने आपल्या सर्वोच्च नेत्याच्या मृत्यूचा बदला घेण्याची शपथ घेतली आहे. इराणचे राष्ट्रपती Masoud Pezeshkian यांनी रविवारी दूरचित्रवाणीवरून राष्ट्राला संबोधित करताना इशारा दिला की, इराणचे सैन्य शत्रूंचे तळ जबरदस्तपणे चिरडून टाकेल. त्यांनी खामेनेई यांच्या मृत्यूला मुस्लिमांविरुद्ध युद्धाची घोषणा असे संबोधले.

इस्लामिक रिपब्लिक ऑफ इराणला या ऐतिहासिक गुन्ह्याचे सूत्रधार आणि अंमलबजावणी करणाऱ्यांविरुद्ध सूड उगवणे हे आपले वैध कर्तव्य आणि अधिकार वाटतो, असे राष्ट्रपतींनी राष्ट्रीय दूरचित्रवाणीवर प्रसारित झालेल्या भाषणात म्हटले.

अमेरिकन तळांवर आणि युद्धनौकेवर हल्ल्याचा दावा

दरम्यान इराणने आखाती प्रदेशातील अनेक अमेरिकन लष्करी तळांवर हल्ले केल्याचा दावा केला आहे. रविवारी इराणने अमेरिकेची विमानवाहू युद्धनौका USS Abraham Lincoln हिला चार बॅलिस्टिक क्षेपणास्त्रांनी लक्ष्य केल्याचा दावा केला. मात्र अमेरिकेच्या United States Central Command (CENTCOM) ने हा दावा फेटाळून लावत अशा कोणत्याही हल्ल्याची पुष्टी नसल्याचे स्पष्ट केले.

इस्रायललाही लक्ष्य केल्याचा दावा

इराणने इस्रायललाही लक्ष्य केल्याचा दावा केला आहे. सोमवारी इराणने इस्रायलचे पंतप्रधान बिन्यामिन नेतान्याहू यांच्या कार्यालयावर हल्ला केल्याचे म्हटले. मात्र तेल अवीव प्रशासनाने हा आरोप खोटा ठरवत तो सरळसरळ खोटा प्रचार असल्याचे म्हटले आहे.

view comments

Location :

Mumbai,Maharashtra

First Published :

Mar 02, 2026 7:54 PM IST

कोण होत्या मनसुरेह खोजस्तेह बाघेरझादेह? खामेनेईंच्या सर्वात जवळच्या व्यक्ती, आयुष्यभर दिली साथ