असद पळून जाताच इज्रायलचा सीरियाच्या भागांवर कब्जा, नेतन्याहूंच्या आदेशानतंर लष्कराने डागली रॉकेट्स!

सीरिया आणि इस्रायलमध्ये 1974 मध्ये एक करार झाला होता. त्यानंतर दोन्ही देशांदरम्यान बफर झोन तयार करण्यात आला. तेव्हापासून इस्त्रायली सैन्य किंवा सीरियन सैन्य त्या भागात येत नव्हते. पण असद निघून जाताच नेतान्याहू त्या भागात पोहोचले. ते म्हणाले, असद सरकार गेल्याने 1974 चा करार तुटला आहे. सीरियन सैनिकांनी आत्मसमर्पण केले आहे. आम्ही कोणत्याही शत्रूला आमच्या सीमेवर पाय ठेवू देणार नाही. यानंतर इस्रायली सैन्य बफर झोनच्या दिशेने सरकले. तसंच एकेकाळी सीरियाचा भाग असलेले भागही ताब्यात घेतले.

आयडीएफने म्हटले आहे की सीमेवरील कुंपण तोडताना कोणी आढळल्यास त्याला ठार मारण्यात येईल. सीरियातील अनेक गावांमध्येही लष्कर पुढे जाण्याच्या तयारीत आहे. परिस्थिती पाहता गोलन हाइट्स परिसरात उपस्थित असलेल्या लोकांना सुरक्षित स्थळी पाठवण्यात आले आहे. आयडीएफच्या सूत्रांनी हारेट्झला सांगितले की, लष्करी गुप्तचरांना सीरियातील परिस्थितीची माहिती होती, परंतु तेथील लष्कराने ज्या प्रकारे आत्मसमर्पण केले ते आश्चर्यकारक आहे.

सीरियातून लेबनॉनला होणारा शस्त्रास्त्रांचा पुरवठा रोखण्यासाठी इस्रायली लष्कराने हल्ले तीव्र केले आहेत. विमानतळाला लक्ष्य केले जात आहे. रासायनिक कारखान्यावर हल्ला केला जात आहे. बंडखोरांनी त्यांना ताब्यात घेऊ नये म्हणून त्यांच्या रासायनिक शस्त्रांना लक्ष्य करण्यात आले. आयडीएफचे म्हणणे आहे की, तिथून हिजबुल्लाला शस्त्रे पुरवली जाऊ शकतात, जी आमच्यासाठी वापरली जाऊ शकतात. आम्ही ती शस्त्रे कोणत्याही परिस्थितीत लेबनॉनमध्ये पोहोचू देणार नाही. ही शस्त्रे बंडखोरांच्या हाती लागण्याचाही धोका आहे, म्हणूनच आम्ही त्यांना सुरक्षित ठेवू शकत नाही. लष्कराने असेही म्हटले आहे की जोपर्यंत त्यांना धोका वाटत नाही तोपर्यंत ते सीरियातील कोणत्याही अंतर्गत घटनांमध्ये सहभागी होणार नाहीत.