आकाशात उडत असलेलं विमान गायब झालं अचानक! 2 दिवसांनंतर कळलं, धावत गेले जवान, पण...

अलास्कामध्ये बेपत्ता झालेल्या Cessna 208B Grand Caravan विमानाचे अवशेष सापडल्याची माहिती अमेरिकेच्या कोस्ट गार्डने शुक्रवारी दिली. हे विमान नॉम (Nome) शहराच्या दक्षिण-पूर्व दिशेला 34 मैलांवर आढळले. हे विमान युनालक्लीट (Unalakleet) येथून नॉमकडे जात होते.

मीडिया रिपोर्टनुसार, या अपघातात तीन जणांचा मृत्यू झाल्याची पुष्टी झाली आहे. उर्वरित सात प्रवासी विमानाच्या ढिगाऱ्यात अडकले असण्याची शक्यता आहे. मात्र, विमानाच्या स्थितीमुळे त्यांच्यापर्यंत पोहोचणे सध्या कठीण आहे. अलास्का राज्य पोलिसांनी दिलेल्या माहितीनुसार, विमानात 9 प्रवासी आणि 1 वैमानिक होता.

नॉमच्या व्हॉलेंटिअर फायर डिपार्टमेंटनुसार, पायलटने एअर ट्रॅफिक कंट्रोलला संपर्क साधत सांगितलं होतं की, तो धावपट्टी साफ होईपर्यंत होल्डिंग पॅटर्नमध्ये उतरण्याचा प्रयत्न करत आहे. मात्र, त्यानंतर काही वेळातच विमानाची उंची आणि वेग झपाट्याने कमी झाला आणि विमानाचा संपर्क तुटला.

अमेरिकेत सध्या विमान अपघातांच्या घटना वाढत असून, अलास्कातील या दुर्घटनेच्या तपासासाठी नॅशनल ट्रान्सपोर्टेशन सेफ्टी बोर्ड आणि फेडरल एव्हिएशन अ‍ॅडमिनिस्ट्रेशन काम करत आहेत. याआधी वॉशिंग्टन डी.सी. येथे ब्लॅक हॉक हेलिकॉप्टर आणि प्रवासी विमान यांची आकाशातच धडक होऊन 67 जणांचा मृत्यू झाला होता. तसेच, फिलाडेल्फियामध्ये मीडिव्हॅक जेट कोसळून 7 जणांचा मृत्यू झाला होता. अमेरिकेत हवाई सुरक्षेवर मोठे प्रश्नचिन्ह निर्माण झाले आहे. या अपघातांमुळे प्रशासनाची झोप उडाली असून, सुरक्षेच्या नियमांची पुनरावलोकन करण्याची गरज निर्माण झाली आहे.