Bus Accident : काही सेकंदात सर्व काही संपलं… फेरीवरील बस पाण्यात कोसळल्याचा थरारक क्षण कॅमेऱ्यात कैद, 23 प्रवाशांचा दुर्दैवी मृत्यू

पोलिस निरीक्षक रसेल मुल्ला यांनी दिलेल्या माहितीनुसार, या भीषण अपघातात आतापर्यंत 23 जणांचे मृतदेह बाहेर काढण्यात आले आहेत. मृतांचा आकडा वाढण्याची भीती व्यक्त केली जात आहे. ही बस राजबारीहून ढाका कडे जात होती. दौलतदिया येथील फेरी टर्मिनल क्रमांक 3 जवळ सायंकाळी 5 च्या सुमारास ही दुर्घटना घडली. बसमध्ये अंदाजे 40 प्रवासी होते, मात्र प्रत्यक्षदर्शींच्या मते ही संख्या जास्त असू शकते कारण बसने वाटेत अनेक प्रवासी घेतले होते.

अपघाताची माहिती मिळताच अग्निशमन दल आणि नौदलाच्या डायव्हर्सनी (Divers) तातडीने बचावकार्य सुरू केलं. रात्रीची वेळ असल्याने कामात अडथळे येत होते, तरीही हम्झा नावाच्या बचाव जहाजाच्या मदतीने रात्री 11:30 च्या सुमारास क्रेनने ती बुडालेली बस नदीबाहेर काढण्यात आली. बसचा काही भाग पाण्याबाहेर येताच तिथे उपस्थित असलेल्या लोकांच्या काळजाचा ठोका चुकला.