Breakup Story : ऐकावं ते नवल! WiFi मुळे कपलचं ब्रेकअप, नेमकी भानगड काय?

चीनमधील हे प्रकरण आहे. ली नावाची तरुणी मे महिन्याची सुट्टी म्हणून बॉयफ्रेंडसोबत चीनच्या चोंगकिंग येथील एका हॉटेलमध्ये गेली. कपल हॉटेलमध्ये चेकइन करत होतं. तेव्हा तरुणीचा फोन हॉटेलच्या नेटवर्कशी आपोआप कनेक्ट झाला. म्हणजे तिच्या फोनमध्ये हॉटेलचं वायफाय सुरू झालं.

सामान्यपणे वायफायला पासवर्ड असतो. तो टाकल्यानंतर वायफाय कनेक्ट होतो. वायफाय एकदा कनेक्ट केल्यानंतर पुन्हा पासवर्ड टाकायची गरज नसते, त्या वायफायच्या नेटवर्कमध्ये आल्यास तो आपोआप कनेक्ट होतो.

साउथ चायना मॉर्निंग पोस्टच्या वृत्तानुसार, हे कपल पहिल्यांदाच एकत्र हॉटेलमध्ये गेलं होतं. त्यामुळे बॉयफ्रेंडने तरुणी फसवणूक करत असल्याचा दावा केला. पण तरुणीने आपण यापूर्वी कधीही हॉटेलमध्ये आली नसल्याचं सांगितलं. नंतर दोघांमध्ये वादविवाद वाढत गेला आणि एके दिवशी तो ब्रेकअप करून तिला कायमचा सोडून गेला.

चौकशी केल्यानंतर, लीला आढळलं की चोंगकिंगमधील दुसऱ्या हॉटेलमध्ये जिथं ती काम करत होती, तिथं त्याच हॉटेलचं युझर नेम आणि पासवर्डसह वाय-फाय वापरत होते. एवढेच नाही तर लीने सत्य बाहेर काढण्यासाठी एका स्थानिक वृत्तवाहिनीशी संपर्क साधला.  आश्चर्यकारक गोष्ट म्हणजे रिपोर्टरचा फोन देखील त्याच प्रकारे हॉटेलच्या वाय-फायशी आपोआप कनेक्ट झाला. यावरून हे सिद्ध झालं की ली जे बोलली ते खरं होतं. तिनं काही चुकीचं केलं नव्हतं, बॉयफ्रेंडची फसवणूक केली नव्हती.

लीने नंतर तिच्या बॉयफ्रेंडशी संपर्क साधून परिस्थिती समजावून सांगितली, परंतु त्याने तिच्याशी बोलण्यास नकार दिला आणि चॅट अॅपवरील तिचं अकाऊंटडिलीट केले.