बिअर आणि व्हिस्की एकत्र करून पिताय? अल्कोहोल मिक्सिंगचा काय होतो परिणाम!

मोठमोठ्या पार्ट्यांमध्ये अल्कोहोल मिक्सिंगचा एक ट्रेंड रूजलाय. चवीला कदाचित हे पेय चांगलं लागत असेलही, मात्र दोन वेगळ्या प्रकारचं अल्कोहोल एकत्र केल्यानं त्याचा विपरित परिणाम शरीरावर होऊ शकतो. व्हिस्की व बिअर ही दोन ड्रिंक्स एकत्र करण्याचे शरीरावर काय परिणाम होतात जाणून घ्या.

दारू प्यायल्याचे आरोग्यावर अनेक वाईट परिणाम होतात. वेळोवेळी ते सिद्धही झालं आहे. मात्र तरीही दारूचं सेवन केलं जातं. आता तर कॉलेजवयीन मुलांमध्ये पार्ट्यांचा ट्रेंड रूजलाय. त्यातच काही वेगळं करण्याच्या नादात बिअर आणि व्हिस्की एकत्र करून प्यायली जाते. मात्र तसं करणं तुमच्या प्रकृतीसाठी धोकादायक ठरू शकतं. व्हिस्कीमध्ये वापरलेले घटक व बिअरमध्ये वापरलेले घटक तसंच त्यांचं प्रमाण भिन्न असतं. दोन्हीची निर्मिती प्रक्रियाही वेगळी असते. अशा वेळी जर या दोन प्रकारच्या दारू एकत्र करून प्यायल्या, तर त्याचा शरीरावर चुकीचा परिणाम होण्याची शक्यता असते. अशा प्रकारे एकत्र केलेली दारू प्यायल्यानं तुम्ही आजारी पडू शकता.

व्हिस्की व बिअर एकत्र केल्यानं शरीरातलं पाणी कमी होऊन डिहायड्रेशनची समस्या उद्भवू शकते. कदाचित एकदा प्यायल्यानं त्रास झाला नाही, तरी हे असं वारंवार केल्यानं पोटावर त्याचा वाईट परिणाम होऊ शकतो. यकृत आणि किडनीवर परिणाम होऊन त्यांचं आरोग्य धोक्यात येऊ शकतं. व्हिस्की आणि बिअर या दोन्हीमध्ये अल्कोहोलचं प्रमाण वेगवेगळं असतं. मात्र हो दोन्ही एकत्र केलं तर त्यामुळे जास्त नशा चढते. अशा कॉकटेल पेयामुळे उलट्या होणं, चक्कर येणं, डोकं दुखणं या गोष्टी घडू शकतात. तसंच काहीवेळा गंभीर परिणामही होऊ शकतात. त्यामुळे व्हिस्की व बिअर एकत्र करून पिऊ नये. काही वेळा गंभीर परिणाम झाल्यामुळे जीवावरही बेतू शकतं. त्यामुळे अशा गोष्टी करणं टाळावं.