शेतकऱ्यांवर दुहेरी संकट, उन्हाचा तडाख्यासह मुसळधार पाऊस बरसणार, २० जिल्ह्यांना अलर्ट

हवामान विभागाने दिलेल्या माहितीनुसार, पश्चिम-मध्य अरबी समुद्रात समुद्रसपाटीपासून सुमारे १.५ किलोमीटर उंचीवर चक्राकार वाऱ्यांची स्थिती निर्माण झाली आहे. तसेच नैऋत्य बंगालच्या उपसागरातील चक्राकार वाऱ्यांची स्थिती कोमोरीन भागाकडे सरकते आहे. या प्रणालीमुळे लक्षद्वीप, केरळ आणि दक्षिण कर्नाटकच्या किनाऱ्यालगत १९ ऑक्टोबरपर्यंत कमी दाबाचे क्षेत्र तयार होण्याची शक्यता वर्तवली गेली आहे. त्यामुळे महाराष्ट्रात वातावरण पुन्हा एकदा पावसासाठी पोषक बनले आहे.

आज (१५ ऑक्टोबर) कोकणातील रत्नागिरी, सिंधुदुर्ग मध्य महाराष्ट्रातील अहमदनगर, पुणे, सातारा, सांगली, सोलापूर, कोल्हापूर मराठवाड्यातील छत्रपती संभाजीनगर, जालना, बीड, परभणी, हिंगोली, धाराशिव, लातूर, नांदेड आणि विदर्भातील अकोला, अमरावती, चंद्रपूर, गडचिरोली या जिल्ह्यांत विजांसह पावसाचा इशारा (येलो अलर्ट) देण्यात आला आहे. तर ठाणे, रायगड, नाशिक आणि जळगाव जिल्ह्यांत तुरळक ठिकाणी पावसाची शक्यता वर्तवली गेली आहे.