Soybean Market : ऐन दिवाळीच्या तोंडावर सोयाबीनच्या दरात सर्वात मोठी घसरण, सध्याचं मार्केट काय?

हिंगोली कृषी उत्पन्न बाजार समितीअंतर्गत मंगळवारी (१४ ऑक्टोबर) ८१० क्विंटल सोयाबीनची आवक झाली. बाजारात प्रति क्विंटल किमान ३६०० रुपये ते कमाल ४२०० रुपये असा दर नोंदवला गेला, तर सरासरी दर ३९०० रुपये इतका राहिला. केंद्र शासनाने जाहीर केलेल्या हमीभावानुसार सोयाबीनसाठी किमान आधारभूत किंमत (MSP) प्रति क्विंटल ५३२८ रुपये आहे. परंतु, सध्या मिळणारा दर हमीभावापेक्षा शेकडो रुपयांनी कमी असल्याने शेतकऱ्यांमध्ये असंतोष आहे.

हिंगोली धान्य बाजारात सोमवारी (१३ ऑक्टोबर) देखील सोयाबीनची ८१० क्विंटल आवक झाली होती. त्यावेळी दर ३६०० ते ४२०० रुपये दरम्यान होते. मानवत बाजार समितीत ५२८ क्विंटल आवक झाली असून, प्रति क्विंटल दर ३५५१ ते ४२०० रुपये, तर सरासरी ४०२५ रुपये मिळाले. सेलू बाजार समितीत २८७ क्विंटल आवक असून, दर ३०७१ ते ४०२६ रुपये आणि सरासरी ३७९९ रुपये होते. जिंतूर बाजारात ७४ क्विंटल सोयाबीन विकले गेले, ज्याचा दर ३७०० ते ४०२५ रुपये दरम्यान होता.

तर परभणी कृषी उत्पन्न बाजार समितीत शनिवारी (११ ऑक्टोबर) ११५ क्विंटल सोयाबीनची आवक झाली. त्यावेळी किमान दर ३९०० रुपये, कमाल ४२५० रुपये आणि सरासरी दर ४२०० रुपये इतका होता. सर्व बाजार समित्यांतील दर पाहता, सोयाबीन उत्पादकांना हमीभाव मिळणे सध्या दूरची गोष्ट ठरली आहे.