कृषी हवामान : विश्रांती नाहीच! पावसाचा आज पुन्हा धुमाकूळ, या जिल्ह्यांना धोक्याचा इशारा, शेतकऱ्यांना आवाहन काय?

Published by:Ajit Bhabad

Last Updated:September 23, 2025 7:57 AM IST

Maharashtra Weather Update : महाराष्ट्रातील बहुतांश भागात सुरू असलेल्या मुसळधार पावसामुळे पूरस्थिती दिवसेंदिवस गंभीर बनत चालली आहे. विशेषतः मराठवाड्यातील अनेक जिल्ह्यांमध्ये अतिवृष्टीमुळे जनजीवन पूर्णपणे विस्कळीत झाले आहे.

मुंबई : महाराष्ट्रातील बहुतांश भागात सुरू असलेल्या मुसळधार पावसामुळे पूरस्थिती दिवसेंदिवस गंभीर बनत चालली आहे. विशेषतः मराठवाड्यातील अनेक जिल्ह्यांमध्ये अतिवृष्टीमुळे जनजीवन पूर्णपणे विस्कळीत झाले आहे. अनेक गावांना पुराच्या पाण्याने वेढा दिला असून शेतकऱ्यांचे मोठ्या प्रमाणावर नुकसान झाले आहे. खरीप हंगामातील हातातोंडाशी आलेली पिके पावसाच्या तडाख्यामुळे मातीमोल झाली आहेत. परिणामी शेतकरी सरकारकडून मदतीची अपेक्षा करत आहेत. दरम्यान, पुढील काही दिवसही पावसाची तीव्रता कायम राहील, असा इशारा हवामान विभागाने दिला आहे.

बीड नद्यांचा पाणीस्तर धोक्याच्या वर

बीड जिल्ह्यात सोमवारी मध्यरात्री पुन्हा एकदा पावसाने जोरदार हजेरी लावली. परिणामी बिंदुसरा नदीला पूर आला असून नदीने रौद्ररूप धारण केले आहे. शहराला पाणीपुरवठा करणारे बिंदुसरा धरण पूर्ण क्षमतेने भरले असून प्रशासनाने नागरिकांना सतर्कतेचा इशारा दिला आहे. अनेक भागांत अडकलेल्या नागरिकांना NDRF पथकाच्या मदतीने सुरक्षित स्थळी हलवण्यात आले. पूरस्थिती पाहता प्रशासनाने शाळा आणि महाविद्यालयांना तात्पुरती सुट्टी जाहीर केली आहे.

जालना, लातूर आणि इतर जिल्ह्यांत हाहाकार

जालना जिल्ह्यातील मंठा तालुक्यातील वाघोडा गावात मुसळधार पावसामुळे पुराचे पाणी शिरले. काही भागांत नागरिक अडकले होते, त्यांना मदत पथकांनी बाहेर काढले. कल्याणमधील वीज प्रकल्प ओव्हरफ्लो झाल्याने परिस्थिती गंभीर झाली. लातूर जिल्ह्यातही अतिवृष्टीमुळे मोठे नुकसान झाले असून 14 प्रमुख रस्ते वाहतुकीसाठी बंद करण्यात आले आहेत. जनजीवनाबरोबरच शेतीपिकांचेही मोठे नुकसान झाल्याचे चित्र आहे. या पार्श्वभूमीवर कृषिमंत्री दत्तात्रय भरणे यांनी दिवाळीपूर्वी सर्व नुकसानग्रस्त शेतकऱ्यांना मदत दिली जाईल, अशी घोषणा केली आहे.

पुढील दिवसांत पावसाचा इशारा

हवामान खात्याने दिलेल्या माहितीनुसार, 26 सप्टेंबर रोजी विदर्भ आणि मराठवाड्याच्या पूर्व व दक्षिणेकडील भागांमध्ये पावसाचा जोर वाढेल. 27 सप्टेंबरला विदर्भ, मराठवाडा, खानदेश, कोकण आणि मध्य महाराष्ट्रात पावसाची तीव्रता आणखी वाढण्याची शक्यता आहे. काही ठिकाणी मुसळधार स्वरूपाचा पाऊस होण्याचा अंदाज व्यक्त केला आहे.

28 सप्टेंबरला राज्याच्या पश्चिम भागांमध्ये पावसाचा जोर कायम राहील. कोकण, पश्चिम महाराष्ट्र आणि खानदेशातील शेतकरी व नागरिकांनी सतर्क राहावे, असे प्रशासनाचे आवाहन आहे.

कृषी विभागाचे आवाहन

पावसाचा तडाखा टाळण्यासाठी कृषी विभागाने शेतकऱ्यांना सूचनाही दिल्या आहेत. काढणी केलेल्या पिकांना वादळी पाऊस आणि वाऱ्यापासून सुरक्षित ठेवा, अशी सूचना विभागाकडून करण्यात आली आहे. तसेच शेतकऱ्यांनी शेतातील पाण्याचा निचरा करण्यावर भर द्यावा, जेणेकरून उभ्या पिकांचे नुकसान टाळता येईल.

अशा प्रकारे, महाराष्ट्रात सतत सुरू असलेल्या पावसामुळे अनेक जिल्ह्यांत पूरस्थिती गंभीर झाली आहे. जनजीवनाबरोबरच शेतीचे मोठे नुकसान झाले असून प्रशासन व बचाव पथके युद्धपातळीवर काम करत आहेत. पुढील काही दिवस पावसाचा धोका कायम असल्याने नागरिकांना सतर्क राहण्याचे आवाहन करण्यात आले आहे.