Sheti Anudan : सरकारकडून गुड न्यूज! या जिल्ह्यातील हजारो शेतकऱ्यांच्या खात्यावर अनुदानाचे पैसे जमा

जिल्ह्यातील 26,981 शेतकऱ्यांसाठी मंजूर करण्यात आलेल्या 125.44 कोटी रुपयांपैकी 106.49 कोटी रुपये जिल्हा कृषी अधीक्षक कार्यालयाला प्राप्त झाले आहेत. त्यातील 101.33 कोटी रुपये थेट शेतकऱ्यांच्या खात्यावर जमा करण्यात आले आहेत. या योजनेद्वारे ठिबक सिंचन, तुषार सिंचन आणि स्प्रिंकलर सिंचन यांसारख्या आधुनिक पद्धतींना चालना देण्यासाठी 50 ते 100 टक्के अनुदान दिले जाते.

योजनेअंतर्गत अद्याप 5671 शेतकऱ्यांना त्यांच्या हक्काचे अनुदान मिळालेले नाही. त्यांच्या खात्यात जमा होण्यासाठी 29.30 कोटी रुपये प्रलंबित आहेत. विशेषतः अनुसूचित जाती व अनुसूचित जमातीच्या शेतकऱ्यांचे अर्ज अपूर्ण असल्याने काही लाभार्थ्यांना अनुदान देणे शक्य झालेले नाही. त्याचबरोबर, 2022-23 मध्ये अर्ज केलेल्या काही शेतकऱ्यांचा समावेश या योजनेत करण्यात आला असून त्यांनाही लाभ मिळण्याची शक्यता आहे.

सरकारने राबवलेल्या या योजनेमुळे जिल्ह्यातील शेतकऱ्यांचे ‘प्रति थेंब अधिक पीक’ हे उद्दिष्ट साध्य करण्यास मदत होईल. पाणीटंचाई व हवामानातील बदलांमुळे सिंचन व्यवस्थेचा विकास होणे अत्यावश्यक आहे, आणि या योजनेंतर्गत दिले जाणारे अनुदान यासाठी उपयुक्त ठरत आहे.

जिल्हा कृषी विभाग उर्वरित अनुदानाचे वितरण लवकरात लवकर करण्यासाठी प्रयत्नशील आहे. शेतकऱ्यांनी अर्ज करताना आवश्यक कागदपत्रे आणि माहिती पूर्ण भरावी, जेणेकरून अनुदान वाटपाची प्रक्रिया अधिक गतिमान होईल, असे कृषी विभागाने स्पष्ट केले आहे.