खर्च तरी निघणार का? शेतातच करपतोय कांदा, रोगाच्या विळख्याने शेतकरी संकटात

पावसाळ्यात लागवड करण्यात आलेला किंवा पेरणी करण्यात आलेला कांदा काढणीसाठी अद्याप साधारणपणे महिन्याचा कालावधी बाकी आहे. मात्र ऐन कांदा फुगवणीच्या काळात कांद्यावर करपा रोगाने थैमान घातल्याने कांद्याच्या पिकाचे मोठ्या प्रमाणात नुकसान झाले आहे. अनेकदा फवारणी करूनही करपा नियंत्रणात येत नाही. त्यामुळे घातलेला खर्चही निघणार नसल्याचे भूम तालुक्यातील जेजला येथील कांदा उत्पादक शेतकरी बालाजी गटकळ यांनी सांगितलं.

ढगाळ वातावरण, अधुनमधून पडणारा पाऊस, जमिनीत नसनारा वापसा आणी धुके या कारणांमुळे करपा रोगाचा प्रादुर्भाव झपाट्याने वाढतो. प्राथमिक अवस्थेपासून योग्य फवारणी केल्यास करपा रोगावर नियंत्रण मिळवता येते. तर करपा रोगाने कांद्याची पात पिवळी पडून करपते आणि कांदा जमिनीत सडतो. त्यामुळे कांदा पिकाचे मोठ्या प्रमाणात नुकसान होते. शेतकऱ्यांनी वेळीच योग्य ती फवारणी करणे गरजेचे आहे. अन्यथा हातातोंडाशी आलेला घास हिरावला जाण्याची शक्यता आहे.