शेकडो वर्षांची परंपरा मोडीत काढली, महिला झाल्या प्रगतशील शेतकरी, तीन महिन्यात झाल्या लखपती, VIDEO

महिला शेती करणार हे ऐकून अनेकांनी या महिलांची थट्टा, चेष्टा आणि खिल्ली उडवत टीका टिप्पणी केली. मात्र, या सर्व गोष्टीकडे कानाडोळा केला आणि या महिलांनी कृषीलक्ष्मी महिला शेतकरी गटाची स्थापना करून अध्यक्षपदी स्मिता शिंदे, सचिवपदी गौरी जाधव, कोषाध्यक्ष म्हणून वनिता शिंदे यांची निवड केली. या गटामध्ये संगीता शिंदे, रुपाली शिंदे, जयश्री शिंदे, मंदा शिंदे, मोहिनी शिंदे, पुष्पा शिंदे, अलका गायकवाड, श्यामल शिंदे, विजया जाधव, फुलाबाई शिंदे, सारिका धुमाळ, रेश्मा शिंदे, रेखा शिंदे या महिला सदस्या कार्यरत आहेत.

या 15 महिला एकत्र येऊन शेतीसाठी ज्या आवश्यक गोष्टी आहेत, त्या एकत्र येऊन करतात. नांगरणी, कुळवणी, खुरपणी, भांगलन, किंवा पाणी देणे या सर्व पाच पाच महिलांचा ग्रुप करून प्रत्येक महिलांच्या शेतात जाऊन काम करतात. त्यामुळे महिलांचे आर्थिक गणित देखील बसू लागले आहे. घेवड्याची लागवड बेड पद्धतीने केली आहे. संपूर्ण 15 एकर शेतीवर सेंद्रिय खतांचा जास्तीत जास्त वापर करत आहेत. वरुण घेवडा जातीच्या दर्जेदार बियाण्याची निवड करून कीटकनाशकांपासून पिकांचे नुकसान टाळण्यासाठी कीड नियंत्रणासाठी कामगंध चिकट, सापळे, पक्षी थांब्याची उभारणी, दशपर्णी अर्काचा वापर करण्यात येते.

शेती गटातील महिलांना एकरी 10 ते 14 क्विंटल घेवड्याचे उत्पादन मिळू लागले आहे. शेती गटातर्फे उत्पादित सर्व घेवड्याची एकत्र विक्री केल्याने किलोला 110 ते 140 रुपये दर मिळत आहे. खर्च वजा करता चांगला आर्थिक नफा हाती शिल्लक राहू लागला आहे. त्यामुळे तीन महिन्यातच घेवडा पिकाचे उत्पादन घेऊन या महिला लखपती होऊ लागल्या आहेत. सरासरी 1 लाख ते 1 लाख 40 हजार रुपये पर्यंतचे उत्पादन या प्रगतशील महिला घेत आहेत. त्यांच्या या यशामुळे कुटुंबात आनंदाचे वातावरण आहे. यासोबतच गावातही या महिलांची प्रतिष्ठा वाढली आहे. अनेक महिलांना त्यांनी प्रोत्साहन देऊन गट तयार करून शेती करण्यासाठी आवाहनही केले आहे.