सांगलीच्या शेतकऱ्याची कमाल, एकरी घेतलं 152 टन उसाचे उत्पन्न, असे केले करेक्ट व्यवस्थापन

सांगली : अतिशय कमी श्रम असणारे पीक म्हणून उसाच्या पिकाकडे पाहिले जाते. परंतु ऊस हे आळशी नव्हे तर काटेकोर व्यवस्थापन करणाऱ्या शेतकऱ्यांचे पीक असल्याचे सिद्ध करत सांगलीच्या शेतकऱ्याने एकरी 152 टन उच्चांकी ऊस उत्पादन घेतले आहे. एक दीड वर्षात नव्हे तर केल्या आठ-दहा वर्षांपासून जमिनीची तयारी करतोय. तेव्हा एकरी 152 टनाचा उतारा काढणं शक्य झालं, अशी प्रतिक्रिया देत सांगलीच्या तरुण ऊस उत्पादकाने उच्चांकी ऊस उतारा मिळवण्यामागील कहाणी सांगितली.

श्रीकांत सुरेश गवळी हे सांगलीच्या कडेगाव तालुक्यातील रामापुर या खेडेगावातील सुशिक्षित शेतकरी आहेत. त्यांच्याकडे एकूण सात एकर शेती असून यापूर्वी ते भाजीपाला पिकवत होते. 2019 पासून आधुनिक तंत्रज्ञानाच्या वापरासह ते सात एकर उसाची शेती करत आहेत. ऊस पिकाबाबत स्वतःच्या अभ्यासासह त्यांनी गन्ना मास्टर या तंत्रज्ञानाचा वापर केला आहे. यामुळेच एकरी 152 टन विक्रमी ऊस उत्पादन घेणे शक्य झाले असल्याचे त्यांनी सांगितले.