पूरग्रस्त शेतकऱ्यांसाठी मोठ्या पॅकेजची घोषणा होणार? मंत्रिमंडळ बैठकीपूर्वी महत्वाची अपडेट

सध्या सरकारकडे अतिवृष्टी घोषित करण्यासाठी काही ठराविक निकष आहेत. त्यानुसार, एखाद्या भागात एकूण ६५ मिलिमीटर पाऊस किंवा सलग पाच दिवस दररोज १० मिलिमीटर पाऊस पडल्यास तो भाग अतिवृष्टीग्रस्त मानला जातो.

मुख्यमंत्री फडणवीस यांनी स्पष्ट केले आहे की, “ओल्या दुष्काळाच्या काळात जशी मदत दिली जाते, तशीच मदत अतिवृष्टीग्रस्त शेतकऱ्यांना दिली जाणार आहे.”

सध्या राज्य सरकारच्या नियमांनुसार, दुरुस्त न होणाऱ्या जमिनीसाठी हेक्टरी ४७,००० रुपये, खरवडून गेलेल्या जमिनीसाठी हेक्टरी १८,००० रुपये मदत दिली जाते. मात्र, मदत आणि पुनर्वसन विभागाने दोन्ही प्रकारच्या नुकसानासाठी समान दराने आणि अधिक रकमेची मदत देण्याचा प्रस्ताव तयार केला आहे. हा प्रस्ताव मंजूर झाल्यास, शेतकऱ्यांना अधिक आर्थिक आधार मिळेल आणि पुनर्बांधणी प्रक्रियेला गती मिळेल.