Weather Alert: 24 तासांत बदलणार हवा, सोलापूरसह 3 जिल्ह्यांना झोडपणार, पश्चिम महाराष्ट्राला IMD चा अलर्ट

राज्यातील हवामानात मोठे बदल जाणवत असून मान्सून परतीच्या मार्गावर आहे. आज, 7 ऑक्टोबर रोजी पूर्व विदर्भासह मराठवाडा, उत्तर कोकण आणि उत्तर मध्य महाराष्ट्रातील काही भांगात जोरादर पावसाची शक्यता आहे. तर पश्चिम महाराष्ट्रात वेगळी स्थिती राहणार आहे. पुढील 24 तासांचा हवामान अंदाज जाणून घेऊ.

पुणे जिल्ह्यात सोमवारी पावसाची उघडीप राहिली. यावेळी 30.4 अंश सेल्सिअस कमाल तापमान राहिले. आज पुणे जिल्ह्यासह घाटमाथ्यावर तुरळक ठिकाणी ढगाळ आकाशासह हलक्या पावसाची शक्‍यता हवामान विभागाकडून वर्तवण्यात आली आहे.

गेल्या 24 तासात सातारा जिल्ह्यातील कमाल तापमान 30.7 अंश सेल्सिअस इतके राहीले. यावेळी पावसाची उघडीप कायम राहिली. आज संपूर्ण साताऱ्यासह सातारा घाटमाथ्यावर ढगाळ आकाशासह हलक्या पावसाची शक्‍यता आहे. तर बुधावारी जोरदार पावसाचा अंदाज असून हवामान विभागाने यलो अलर्ट जारी केला आहे.

कोल्हापूर जिल्ह्यात सोमवारी पावसाची उघडीप राहिली. आज जिल्ह्यात कमाल तापमान 29.7 अंशावर राहिल. तसेच पुढील 24 तासात कोल्हापूरसह घाटमाथ्यावर ढगाळ आकाशासह हलक्या पावसाची शक्यता वर्तवण्यात आली आहे. पुढील काही दिवस हवामानाची हीच स्थिती कायम राहील.

सोलापूर जिल्ह्यात मागील 24 तासात 0.4 मिलिमीटर पावसाची नोंद झाली. यावेळी 31.0 अंश सेल्सिअस कमाल तापमान नोंदवण्यात आले. आज सोलापूर जिल्ह्यात हलक्या पावससाचा अंदाज आहे. तर बुधवारी पावसाचा जोर वाढणार असून हवामान विभागाने यलो अलर्ट जारी केला आहे.

सांगली जिल्ह्यात मागील 24 तासात पावसाची उघडीप राहिली. यावेळी कमाल तापमान 30.7 अंश सेल्सिअस इतके राहिले. पुढील 24 तासात जिल्ह्यात अंशत ढगाळ आकाशासह हलक्या पावसाची शक्यता वर्तवली आहे. 8 ऑक्टोबरला सांगली जिल्ह्याला यलो अलर्ट असेल.

पश्चिम महाराष्ट्रातील पाचही जिल्ह्यांत ढगाळ हवामानासह हलका ते मध्यम पाऊस होईल. आज कोणताही सतर्कतेचा इशारा नाही. मात्र, बुधवारी, सोलापूर, सांगली आणि सातारा या जिल्ह्यांत जोरदार पावसाची शक्यता असून हवामान विभागाने यलो अलर्ट जारी केला आहे. तर तापमानात देखील सातत्याने चढ-उतार जाणवत आहेत. त्यामुळे नागरिकांना योग्य ती काळजी घ्यावी लागेल.