Trending:

तुमचा ट्रॅक्टर बनवा सर्वात शक्तिशाली! हायनो-हॉर्स गिअर सिस्टीम काय आहे? कसा होतोय फायदा?

Published by:Ajit Bhabad

Last Updated:October 08, 2025 1:31 PM IST

Tractor Maintainance Tips : आधुनिक शेतीत ट्रॅक्टर हा शेतकऱ्यांचा सर्वात विश्वासू साथीदार आहे. गेल्या काही वर्षांत ट्रॅक्टर क्षेत्रात सिंक्रोमेष गिअरबॉक्स, हाय-लो शटल आणि ऑटोमॅटिक निअरशिफ्ट यांसारख्या तंत्रज्ञानाची भर पडली आहे.

इम्पॅक्ट शॉटतुमचा गेटवे लेटेस्ट न्यूज

मुंबई : आधुनिक शेतीत ट्रॅक्टर हा शेतकऱ्यांचा सर्वात विश्वासू साथीदार आहे. गेल्या काही वर्षांत ट्रॅक्टर क्षेत्रात सिंक्रोमेष गिअरबॉक्स, हाय-लो शटल आणि ऑटोमॅटिक निअरशिफ्ट यांसारख्या तंत्रज्ञानाची भर पडली असली, तरी अनेकदा अवजड काम करताना ट्रॅक्टरला आवश्यक ती ताकद मिळत नाही. विशेषतः ऊस ट्रॉली ओढणे किंवा जड नांगरणीसारख्या कामात ट्रॅक्टरचे टायर जागच्या जागी फिरतात, डिझेल वाया जाते आणि वेळही खर्च होतो. या अडचणींवर उपाय म्हणून हायनो-हॉर्स गिअर सिस्टीम आता ट्रॅक्टरमध्ये मोठ्या प्रमाणावर लागू केली जात आहे.

काय आहे हायनो-हॉर्स गिअर सिस्टीम?

ही प्रणाली विशेषतः ५० एचपी किंवा त्याहून अधिक क्षमतेच्या ट्रॅक्टरसाठी विकसित करण्यात आली आहे. हायनो गिअर आणि हॉर्स गिअर असे दोन विभाग यात असतात

हायनो गिअर: कमी वेगाने पण जास्त टॉर्क (ताकद) देणारा गिअर. नांगरणी, ट्रॉली ओढणे, भुईमूग खोदणी किंवा कठीण जमिनीत काम करण्यासाठी योग्य.

हॉर्स गिअर: वेगवान पण तुलनेने कमी ताकदीचा गिअर. रस्त्यावर वाहतूक, हलकी मशागत किंवा माल बाजारात नेण्यासाठी उपयुक्त.

कमी खर्चात टिकाऊ यंत्रणा

हायनो-हॉर्स गिअर सिस्टीमचे सर्वात मोठे वैशिष्ट्य म्हणजे ती स्वस्त आणि टिकाऊ आहे. या गिअरबॉक्सची रचना साधी असून महागडे स्पेअर पार्ट्स किंवा विशेष उपकरणांची आवश्यकता नाही. त्यामुळे उत्पादन खर्च कमी होतो आणि दुरुस्ती सहज शक्य होते. गावातील साधे मेकॅनिकही हा गिअरबॉक्स सहज दुरुस्त करू शकतात.

या गिअर सिस्टीममध्ये कॉन्स्टंट मेश गिअर तंत्रज्ञान वापरले गेले आहे, ज्यामुळे गिअर बदलताना झटके बसत नाहीत आणि ट्रॅक्टरचा कार्यक्षम वेग टिकून राहतो. तसेच, १६ फॉरवर्ड आणि ४ रिव्हर्स गिअरच्या मांडणीमुळे शेतकऱ्यांना कामानुसार योग्य पर्याय निवडता येतो.

देखभाल आणि कार्यक्षमता

या गिअरबॉक्सचे दात जाड आणि मजबूत असल्यामुळे ग्रामीण भागातील धूळ, चिखल आणि उंचसखल रस्त्यांनाही तो सक्षमपणे तोंड देतो. वेळोवेळी तेलबदल आणि थोडीशी काळजी घेतल्यास हा गिअरबॉक्स अनेक वर्षे उत्तम प्रकारे चालतो.

शेतीसाठी उपयुक्त

भारताच्या भौगोलिक परिस्थितीमध्ये शेती बहुतेक ठिकाणी उंचसखल आणि ओलसर जमिनीत केली जाते. अशा ठिकाणी ट्रॅक्टरला अधिक ताकद देणारी प्रणाली आवश्यक असते. हायनो-हॉर्स गिअर सिस्टीममुळे ही गरज पूर्ण होते, ज्यामुळे नांगरणी, रोटाव्हेटर, ऊस ट्रॉली ओढणे यांसारखी जड कामे अधिक कार्यक्षमतेने होतात.

दरम्यान, हॉर्स गिअर वापरल्यास ट्रॅक्टरला अधिक वेग मिळतो, त्यामुळे शेतमाल जलदगतीने बाजारात नेता येतो. ग्रामीण भागात रस्त्यांवर लांब अंतर कापताना ही प्रणाली अत्यंत फायदेशीर ठरते.