बीड: अनेक शिक्षक आपल्या योगदानाने आदर्श निर्माण करत असतात. बीड जिल्ह्यातील शिक्षण क्षेत्रासाठी एक अत्यंत अभिमानास्पद बाब आहे. वडवणी तालुक्यातील चिंचाळा येथील प्राथमिक शिक्षक गंगाधर हरी डवरे यांना मैत्रा फाऊंडेशनच्या वतीने दिला जाणारा ‘शिक्षण महर्षी राज्यस्तरीय आदर्श शिक्षक पुरस्कार’ देऊन सन्मानित करण्यात आले. त्यांच्या उत्कृष्ट अध्यापन कार्यामुळे आणि विद्यार्थ्यांच्या सर्वांगीण विकासासाठी केलेल्या भरीव योगदानामुळे हा पुरस्कार मिळवण्याचा मान त्यांना मिळाला आहे.
advertisement
गंगाधर हरी डवरे हे विद्यार्थ्यांच्या कलागुणांना वाव देण्यासाठी सतत प्रयत्नशील राहिले आहेत. विद्यार्थ्यांच्या बौद्धिक, शारीरिक आणि मानसिक विकासासाठी त्यांनी अनेक उपक्रम राबवले आहेत. शिक्षणात नवनवीन तंत्रज्ञानाचा वापर करून विद्यार्थ्यांसाठी शिकण्याची प्रक्रिया सोपी, समजण्यास सोयीस्कर आणि आनंददायी करण्यासाठी त्यांनी नेहमी पुढाकार घेतला आहे. हे शिक्षक तंत्रस्नेही शिक्षक म्हणून ओळखले जातात. ते डिजिटल साधनांचा प्रभावीपणे वापर करून शिक्षण देतात. कोरोना काळात त्यांनी यूट्यूबच्या माध्यमातून विद्यार्थ्यांसाठी शैक्षणिक व्हिडिओ तयार केले. त्यामुळे शिक्षणाचा खंड पडण्याऐवजी विद्यार्थ्यांना नवनवीन पद्धतीने शिकण्याचा आनंद मिळाला.
देशी गाई सांभाळा, अथवा आमच्याकडे द्या! 28 वर्षांपासून नाशिककराची गोसेवा!
सामाजिक कार्यातही अग्रेसर
गंगाधर डवरे शिक्षणाबरोबरच सामाजिक कार्यातही नेहमीच आघाडीवर राहिले आहेत. गावातील सामाजिक उपक्रमांमध्ये ते सक्रिय सहभाग घेतात. विद्यार्थ्यांसोबतच पालकांमध्येही जागरूकता निर्माण करण्याचे काम त्यांनी केले आहे. शिक्षणाचे महत्त्व आणि मुलांच्या भविष्यासाठी योग्य दिशा ठरविण्याबाबत पालकांना मार्गदर्शन करण्याचे कार्य त्यांनी यशस्वीपणे पार पाडले आहे. त्यांच्या यशामुळे इतर शिक्षकांनाही प्रेरणा मिळेल आणि शिक्षण क्षेत्रात नव्या संधींचा शोध घेण्यासाठी प्रोत्साहन मिळेल.
डवरे गुरुजी विद्यार्थ्यांना केवळ पुस्तकांतील ज्ञान देण्यातच सीमित राहिले नाहीत, तर त्यांना जीवनातील आवश्यक कौशल्ये आत्मसात करण्यासाठीही मार्गदर्शन करतात. गुणवत्तापूर्ण शिक्षण देण्याच्या त्यांच्या कटिबद्धतेमुळे त्यांची ओळख एक आदर्श शिक्षक म्हणून झाली आहे. त्यांच्या अध्यापन पद्धतींमुळे विद्यार्थी आत्मविश्वासाने भरलेले आणि सर्वांगीण विकास साधणारे झाले आहेत.
गंगाधर हरी डवरे यांनी शिक्षण क्षेत्रात दिलेले योगदान वाखाणण्याजोगे आहे. त्यांच्या अथक परिश्रमाने आणि विद्यार्थ्यांवरील प्रेमामुळेच त्यांना ‘शिक्षण महर्षी राज्यस्तरीय आदर्श शिक्षक पुरस्कार’ प्रदान करण्यात आला आहे. त्यांच्या कार्याचा आदर्श इतर शिक्षकांनी घेतल्यास शिक्षण क्षेत्र अधिक उज्ज्वल होईल. मैत्रा फाऊंडेशनचा हा उपक्रम शिक्षकांना प्रेरणा देणारा असून शिक्षण क्षेत्रातील मानवी मूल्यांची जोपासना करण्यास हातभार लावणारा आहे.