TRENDING:
चेंदणी कोळीवाडा परिसरात राहणारे महेश नाखवा (वय 54) यांची चाकूने वार करून हत्या करण्यात आल्याचे बुधवारी उघडकीस आले. या घटनेनंतर ठाणेनगर पोलीस ठाण्यात खुनाचा गुन्हा दाखल करण्यात आला. घटनेचे गांभीर्य लक्षात घेता ठाणे गुन्हे शाखेच्या मालमत्ता गुन्हे कक्षाने समांतर तपास सुरू केला.
advertisement
तपासादरम्यान परिसरातील सीसीटीव्ही फुटेज तसेच तांत्रिक विश्लेषणाच्या आधारे पोलिसांना महत्त्वाचे धागेदोरे मिळाले. आरोपी हे गुजरातकडे पळून जाण्याच्या तयारीत असल्याची माहिती मिळाल्यानंतर पोलिसांनी तात्काळ पथक रवाना केले. अहमदाबादकडे जाणाऱ्या मार्गावर कारवाई करत काली उर्फ रघु चौहान (वय 27) आणि शायर मंग्रोलिया (वय 21) या दोघांना ताब्यात घेण्यात आले.
तपासात समोर आलेल्या माहितीनुसार, मृत महेश नाखवा हा रघु चौहान याच्या मैत्रिणीला सातत्याने त्रास देत होता. यामुळे संतप्त झालेल्या रघुने आपल्या मित्रासह संगनमत करून नाखवा याचा काटा काढण्याचा कट रचला. ठरल्याप्रमाणे सिडको बस थांब्याजवळ नाखवा याच्यावर चाकूने वार करून त्याची हत्या करण्यात आली.
या प्रकरणात गुजरातमध्ये राहणाऱ्या रघु याच्या मैत्रिणीलाही अटक करण्यात आली असून तिनेही या गुन्ह्यासाठी सहकार्य केल्याचे तपासात निष्पन्न झाले आहे. अशा प्रकारे या हत्याकांडात सहभागी असलेल्या तिघांना पोलिसांनी अटक केली आहे.
दरम्यान, ही यशस्वी कारवाई गुन्हे शाखेचे उपायुक्त अमरसिंह जाधव यांच्या मार्गदर्शनाखाली वरिष्ठ पोलीस निरीक्षक गोरखनाथ घार्गे आणि पोलीस निरीक्षक प्रताप भोसले यांच्या पथकाने केली. पुढील तपास सुरू असून आरोपींना न्यायालयात हजर करण्यात येणार आहे.