अभिनेत्री आरती छाब्रिया आई झाली आहे. अभिनेत्रीनं 4 मार्च रोजी आपल्या मुलाला जन्म दिला . अभिनेत्रीनं त्याच्या नावाचाही खुलासा केला आहे. आरतीनं आपल्या मुलाचं नाव 'युवान' असं ठेवलं आहे. मुलगा युवानच्या जन्मानंतर एका महिन्यानंतर अभिनेत्रीनं ही गुडन्यूज शेअर केली आहे. नुकतंच तिने मातृत्वाच्या प्रवासाबद्दलचा अनुभव शेअर केला आणि तिने ही बातमी आत्तापर्यंत चाहत्यांपासून का लपवली होती याचा देखील खुलासा केला आहे. वयाच्या 41 व्या वर्षी आई झालेल्या आरती छाब्रियाने तिच्या प्रेग्नेंसीची बातमी संपूर्ण 9 महिने चाहत्यांपासून लपवून ठेवली होती.
advertisement
Disney च्या सिनेमात राणी होणार आलिया भट्ट? आगामी प्रोजेक्टविषयी मोठी माहिती समोर
हिंदुस्तान टाइम्सशी तिच्या मातृत्वाच्या प्रवासाविषयी बोलताना अभिनेत्री म्हणाली, 'जेव्हा तुम्ही 41 वर्षांचे असता तेव्हा आई होणं वयाच्या विशी किंवा तिशी इतकं सोपं नसतं. माझ्यासाठी ही खूप अवघड प्रक्रिया होती. भूतकाळात माझा अनेकदा गर्भपात झाला. त्यामुळंच योग्य वेळ आल्यावरच ही बातमी चाहत्यांना देऊ असं मला वाटलं. मला वेळेआधी याविषयी कोणाला काही सांगायचं नव्हतं. शेवटी मी पण माणूसच आहे. या काळात मला अनेक समस्यांचा सामना करावा लागला.'
आरती पुढे म्हणाली, 'लोकांना वाटतं की ती अभिनेत्री आहे म्हणून तिच्यासाठी या गोष्टी सोप्या असतील. पैसे देऊन सगळं काम होईल. पण तसं नसतं. गर्भधारणेच्या उपचारांचा माझ्या शरीरावर खूप वाईट परिणाम झाला. माझं शरीर सुस्त झालं होतं. माझं वजनही वाढत होतं. माझ्या शरीरासाठी मला ट्रोलही करण्यात आलं. मी खूप थकले होते.' असा खुलासा अभिनेत्रीनं केला आहे. पण इतक्या कष्ट आणि मेहनत घेऊन आई झाल्यानंतर अभिनेत्री खूपच आनंदी आहे.
आरती छाब्रियाने 2019 मध्ये विशारद बिदासीशी लग्नगाठ बांधली होती. त्यानंतर ती पतीसोबत ऑस्ट्रेलियाला शिफ्ट झाली. याविषयी बोलताना ती म्हणाली होती की, 'कोविडच्या काळात आम्ही ऑस्ट्रेलियात अडकलो होतो. ती स्थिती खूप तणावपूर्ण होती. तणावाखाली गर्भधारणा होणं कोणासाठीही अवघड आहे. या काळात मी प्रेग्नन्ट राहिले, पण तणावामुळे माझा गर्भपात झाला. तो काळ माझ्यासाठी खूप कठीण गेला होता. पण आता माझ्या मुलाच्या जन्मानंतर माझ्या सगळ्या समस्या नाहीशा झाल्यासारखं वाटतंय. तो काळ आम्हा सर्वांसाठी खूप कठीण होता. पण, हे सर्व सहन केल्यानंतर आज अखेर आनंद आमच्या आयुष्यात आला आहे.' अशा भावना अभिनेत्रीनं व्यक्त केल्या आहेत.