अथर्व सुदामेच्या व्हिडिओमध्ये तो एका गणपतीच्या कारखान्यात जातो, जिथे गणपती बनवणारा माणूस मुस्लिम असतो. त्याची ओळख समोर येताच तो अथर्वला म्हणतो की तुम्ही दुसऱ्या दुकानातूनही मूर्ती खरेदी करू शकता. अथर्व त्याला सांगतो की, माझे वडील सांगतात, ‘आपण साखर व्हावं जी खीरही बनवते आणि शीर खुर्माही. तसंच आपण वीट व्हावं जी देवळातही लावली जाते आणि मशिदीमध्येही.’ या व्हिडिओवरूनच त्याला ट्रोल करण्यात आलं होतं. या व्हिडिओवर पुण्यातील माजी मनसे नेते वसंत मोरे यांनीही कडक शब्दात टीका केली होती.
advertisement
डॅनी पंडितचा व्हिडिओ व्हायरल
अथर्वच्या व्हिडिओमुळे सुरू झालेल्या वादात आता डॅनी पंडितने एक नवीन व्हिडिओ बनवून आपली बाजू मांडली आहे. या व्हिडिओमध्ये डॅनीच्या घरी गणपती बाप्पाचं आगमन झालेलं दिसत आहे. तो आणि त्याचे मित्र गणपतीची आरती करत आहेत.
आरती सुरू असतानाच दारावर एक मुस्लिम महिला येते आणि तिच्या मुलीला हाक मारते. ती मुलगी लगेच आरतीतून बाहेर जाते. सगळ्यांनाच आश्चर्य वाटतं. मात्र काही वेळाने ती मुलगी हातात मोदकांनी भरलेलं ताट घेऊन परत येते. डॅनी तिला विचारतो की, “हे मोदक तू बनवले का?” तेव्हा ती मुलगी उत्तर देते, “नाही, अम्मीने बनवलेत.”
त्या मुलीची अम्मीही तिच्या मागून डॅनीच्या घरी येऊन सगळ्यांना मोदक खाण्याचा आग्रह करते. सगळे खुश होतात आणि मोदक खातात. डॅनीच्या या व्हिडिओने आता लोकांची मनं जिंकली आहेत. या व्हिडिओमधून त्याने कोणताही मोठा डायलॉग न वापरता शांतपणे हिंदू-मुस्लिम ऐक्याचा संदेश दिला आहे.