TRENDING:
महाराष्ट्राने उंचावली देशाची मान!
यंदा 'इफ्फी'मध्ये ११३० चित्रपटांची नोंदणी झाली होती, त्यातील ५७० फिचर फिल्म्समधून हा पुरस्कार 'गोंधळ'ला मिळाला आहे. या पुरस्काराचे स्वरूप पंधरा लाख रुपये रोख आणि सन्मानचिन्ह असे आहे. २०१९ मध्ये 'जल्लीकट्टू' (Jallikattu) चित्रपटासाठी लिजो जोस यांना 'सिल्व्हर पिकॉक सेक्शन'मध्ये सर्वोत्कृष्ट दिग्दर्शकाचा पुरस्कार मिळाला होता. त्यानंतर कोणत्याही भारतीय चित्रपटाला हा पुरस्कार मिळाला नव्हता. यंदा 'गोंधळ'च्या निमित्ताने हा मान पुन्हा भारताला मिळाला आहे.
advertisement
विशेष म्हणजे, संतोष डावखर यांनी या चित्रपटातून दिग्दर्शनात पदार्पण केले आहे. पदार्पणाच्या पहिल्याच चित्रपटासाठी त्यांना थेट 'सर्वोत्कृष्ट दिग्दर्शका'चा अवॉर्ड मिळणे, ही त्यांच्यासाठी खूप मोठी कामगिरी आहे. हा सोहळा गोव्याचे मुख्यमंत्री प्रमोद सावंत, केंद्रीय मंत्री अश्विनी वैष्णव यांच्यासह रजनीकांत, रणवीर सिंग, नवाजुद्दीन सिद्दीकी यांसारख्या दक्षिणात्य आणि बॉलिवूडमधील सुपरस्टार्सच्या उपस्थितीत संपन्न झाला.
महाराष्ट्राच्या संस्कृतीचा जागतिक स्तरावर डंका
'गोंधळ' चित्रपट हा केवळ पारंपरिक विधीवर आधारित नाही, तर तो आपल्या मातीत रुजलेल्या श्रद्धा, लोकपरंपरा आणि मानवी भावनांचे प्रभावी चित्रण करतो. नवरा-नवरीच्या आयुष्यातील विघ्न दूर करण्यासाठी साजऱ्या होणाऱ्या 'गोंधळ' या विधीच्या पार्श्वभूमीवर ही कथा अंधश्रद्धा, कुटुंबातील नात्यांचे संघर्ष, आणि माणसांच्या मनात दडलेल्या रहस्यांचा धागा उलगडते.
चित्रपटाचे भव्य सादरीकरण, प्रभावी सिनेमॅटोग्राफी आणि उत्कृष्ट तांत्रिक बांधणी यामुळे 'गोंधळ' मराठी संस्कृतीचे मूळ जागतिक प्रेक्षकांसमोर ताकदीने सादर करतो. संतोष डावखर यांनीच कथा, पटकथा आणि संवाद लिहिले आहेत, तर दीक्षा डावखर सहनिर्मात्या आहेत.
मातीतल्या कलेचा सन्मान
या ऐतिहासिक विजयानंतर दिग्दर्शक संतोष डावखर भावूक झाले. "हा सन्मान आमच्या संपूर्ण टीमच्या मेहनतीचा गौरव आहे. हा आमच्या मातीतल्या कलेचा, श्रद्धेचा आणि अस्सल भावविश्वाचा सन्मान आहे," अशा शब्दांत त्यांनी आपल्या भावना व्यक्त केल्या.