सिंगल पेरेंटिंग खूप कठीण आणि भयानक
शोएब मलिकपासून विभक्त झाल्यानंतर सानिया मिर्झा तिचा मुलगा इझान याचे एकटीने पालनपोषण करत आहे. आपल्या पॉडकास्टमध्ये बोलताना तिने सिंगल पॅरेंटिंगबद्दल अनेक भावनिक आणि आव्हानात्मक खुलासे केले. सानिया म्हणाली, "माझ्यासाठी सिंगल पेरेंटिंग खूप कठीण आहे, कारण आम्ही काम करत असतो आणि अनेक वेगवेगळ्या गोष्टी करत असतो." ती पुढे म्हणाली की, या जबाबदारीच्या ओझ्यामुळे तिला खूप घाबरल्यासारखे वाटते.
advertisement
करण जोहरने "दुसऱ्यासोबत संघर्ष करावा लागत नाही, हा दिलासा आहे" असे सांगून वातावरण हलके करण्याचा प्रयत्न केला. पण सानिया म्हणाली, "वास्तविक परिस्थिती यापेक्षा खूपच कठीण आहे. माझी परिस्थिती 'क्रॉस-बॉर्डर' ची आहे, जी आणखीनच भयानक आहे."
सानिया मिर्झा अनेकदा कामानिमित्त दुबई आणि भारत येथे प्रवास करत असते आणि यामुळे कधीकधी मुलापासून दूर राहावे लागत असल्यामुळे तिला खूप अपराधी वाटते. सानिया म्हणाली, "मला माझ्या मुलाला सोडून जाणे सर्वात मोठे आव्हान वाटते. माझ्यासाठी त्याच्यापासून एक आठवड्यासाठी दूर राहणे खूप कठीण आहे."
तिने एकटेपणाबद्दलही प्रामाणिकपणे सांगितले. सानिया म्हणाली, "किती वेळा मी रात्रीचे जेवण टाळले आहे, कारण मला एकटीला जेवण करायचे नसते. मला वाटते यामुळेच माझे वजन कमी झाले. मी काहीतरी पाहणे आणि झोपणे पसंत करते."
पॅनिक अटॅक आले, धावली मदतीला फराह खान
पॉडकास्टच्या पहिल्या एपिसोडमध्ये सानियाची मैत्रीण फराह खान आली होती. तिने खुलासा केला होता की, घटस्फोटाच्या काळात सानियाला पॅनिक अटॅक येत होते. फराह म्हणाली, "मी खूप घाबरले होते. मी तुला कधीही पॅनिक अटॅक आलेले पाहिले नव्हते. मला त्या दिवशी शूटिंग होते, पण मी सर्व सोडून लगेच तुझ्या सेटवर आले." सानियाने त्या दिवसाबद्दल सांगितले, "तो माझ्या सर्वात वाईट दिवसांपैकी एक होता. मला त्यानंतर एका लाइव्ह शोमध्ये जायचे होते. तू तिथे नसतीस, तर मी तो शो करू शकले नसते. मी थरथर कापत होते."
शोएब मलिकसोबत घटस्फोट झाल्यानंतरही सानियाने कधीही तिच्या आयुष्याबद्दल इतक्या मोकळेपणाने भाष्य केले नव्हते. मात्र, इतक्या वर्षांनंतर तिने केलेल्या या खुलाशामुळे चाहत्यांना तिला झालेल्या त्रासाचा अंदाज आला आहे. दरम्यान, आता सानिया तिच्या आयुष्यात खूप पुढे गेली असून ती आपल्या मुलासह आनंदी जीवन जगत आहे.