खासदार चव्हाण यांचा ताफा सारखणी गावातून जात असताना अचानक आंदोलनकर्त्यांनी रस्ता रोखला. स्थानिक पोलिसांनी हस्तक्षेप करून परिस्थिती नियंत्रणात आणली. मात्र, आंदोलनकर्त्यांनी खासदारांना भेटून आपल्या मागण्यांचे निवेदन देण्याचा प्रयत्न केला. बंजारा समाजाला ST प्रवर्गातून आरक्षण देण्याची मागणी गेल्या काही दिवसांपासून राज्यभर जोर धरत आहे. त्याच पार्श्वभूमीवर किनवट परिसरातही बंजारा बांधव मोठ्या संख्येने रस्त्यावर उतरले.
advertisement
आमच्या मागण्या मान्य करा अन्यथा खुर्च्या खाली करा, आंदोलक आक्रमक
या वेळी खासदार अशोक चव्हाण यांनी ताफा अडवल्यानंतर आंदोलनकर्त्यांशी संवाद साधण्याचा प्रयत्न केला. तुम्हाला तुमच्या मागण्या सांगायच्या असतील तर ते शांततेने सांगा. पण हे जर करायचं असेल तर मला थांबवलं कशाला? असा सवाल त्यांनी आंदोलकांना केला. त्यानंतर संतप्त आंदोलकांनी आमच्या मागण्या मान्य करा अन्यथा खुर्च्या खाली करा, असे म्हणत जोरदार घोषणाबाजी केली.
काही काळ तणावाचे वातावरण निर्माण
या घटनेमुळे सारखणी परिसरात काही काळ तणावाचे वातावरण निर्माण झाले होते. मात्र, परिस्थिती नंतर सुरळीत करण्यात आली. बंजारा समाजाच्या आरक्षणाच्या मागणीवरून राज्यात पुन्हा एकदा असंतोष वाढत असून, येत्या काही दिवसांत या आंदोलनाला आणखी उग्र वळण मिळण्याची शक्यता वर्तवली जात आहे.