ही घटना शुक्रवारी रात्री उशिरा श्रीरामपूरच्या छत्रपती शिवाजी रोडवर घडली. दीपक चव्हाण रात्री घरी जात असताना अचानक दुचाकीवरून आलेल्या काही अज्ञातांनी हल्ला केला आणि त्यांना मारहाण केली. हल्ल्यानंतर त्यांना तातडीने स्थानिक रुग्णालयात दाखल करण्यात आले, जिथे त्यांच्यावर सध्या उपचार सुरू आहेत.
या घटनेची माहिती मिळताच भाजपचे अनेक कार्यकर्ते आणि समर्थक मोठ्या संख्येने श्रीरामपूर शहर पोलीस ठाण्याबाहेर जमा झाले. रात्री उशिरापर्यंत त्यांची गर्दी होती. पोलिसांनी तातडीने या प्रकरणाची दखल घेतली आहे.
advertisement
मिळालेल्या माहितीनुसार, ज्यावेळी ही घटना घडली तेव्हा दीपक चव्हाण हे आपल्या मित्राला भेटून घराच्या दिशेनं जात होते. ते रात्री उशिरा छत्रपती शिवाजी रोडवर आले असता, अज्ञातांनी त्यांचा रस्ता अडवला आणि भररस्त्यात मारहाण केली.
या प्रकरणी श्रीरामपूर शहर पोलीस ठाण्यात अज्ञात व्यक्तींविरोधात गुन्हा दाखल करण्यात आला असून, पोलीस पुढील तपास करत आहेत. या हल्ल्यामागचे कारण अद्याप स्पष्ट झालेले नाही. हल्लेखोरांचा शोध पोलीस घेत आहेत. परिसरातील सीसीटीव्ही कॅमेऱ्यात काही कैद झालं आहे का? याचा तपासही पोलीस करत आहेत.