आगामी महापालिका निवडणुकीच्या पार्श्वभूमीवर शिवसेना ठाकरे गटासाठी हा निर्णय महत्त्वाचा असल्याची चर्चा सुरू आहे. मुंबई महापालिकेच्या कारभारावरून भाजप ठाकरे गटाविरुद्ध आक्रमक होण्याची शक्यता आहे. तर, महाविकास आघाडी सरकारच्या काळात भाजपचे माजी खासदार किरीट सोमय्या यांनी आरोपांचा धुरळा उडवत एकच खळबळ उडवून दिली होती. यामध्ये ठाकरेंच्या निकटवर्तीयांची चौकशी झाली होती. आता सुजित पाटकरांना कोर्टाने जामीन मंजूर केला आहे. पाटकर यांना कोर्टाकडे आपला पासपोर्ट जमा करावा लागणार असून इतरही काही अटी जामिनासाठी कोर्टाने ठेवल्या आहेत.
advertisement
जंबो कोविड सेंटर घोटाळा प्रकरणात अडचणीत आलेले उद्धव ठाकरे यांचे निकटवर्तीय व व्यावसायिक सुजित पाटकर यांना अखेर दोन लाखांच्या जातमुचलक्यावर न्यायालयाने जामीन मंजूर केला आहे. भाजप नेते आणि माजी खासदार किरीट सोमय्या यांनी या प्रकरणात मोठा आरोप करत 36 कोटी रुपयांच्या घोटाळ्याचा ठपका ठेवत पाटकर यांच्याविरोधात तक्रार दाखल केली होती. त्यानंतर मुंबईतील आझाद मैदान पोलीस ठाण्यात गुन्हा दाखल करण्यात आला होता आणि प्रकरणाचा तपास आर्थिक गुन्हे शाखेकडे सोपवण्यात आला.
ईडीने यापूर्वीच मनी लॉन्ड्रिंग प्रकरणात पाटकर यांना अटक केली होती. संजय राऊत यांच्या निकटवर्तीयांना अटक झाल्याने राजकीय वर्तुळात खळबळ उडाली होती.ईडीच्या कारवाईनंतर मुंबई पोलिसांनीही तपासाला गती दिली होती. कोरोना काळात मुंबई महापालिकेने जंबो कोविड-19 केंद्र चालवण्यासाठी खासगी कंत्राटदारांची नियुक्ती केली होती. हे कंत्राट मिळवण्यासाठी बोगस कागदपत्रे दाखल केली होती. त्याशिवाय, रुग्णसंख्येतही फेरफार केली असल्याचा ठपका ठेवण्यात आला होता.