TRENDING:
या रिंग रोडचा प्रस्ताव सार्वजनिक बांधकाम विभागाकडून शासनाकडे सादर करण्यात आला होता. शासनाने त्यावर तातडीने सहमती दर्शवत सर्वेक्षण आणि भूसंपादनास मंजुरी दिली आहे. सध्या सर्वेक्षण करणाऱ्या कंपनीची निवड करण्यासाठी निविदा प्रक्रिया राबवण्याची फाइल मंजुरीसाठी दाखल करण्यात आली आहे. लवकरच ही मंजुरी मिळाल्यानंतर प्रत्यक्ष निविदा प्रक्रिया सुरू होणार असल्याचे सार्वजनिक बांधकाम विभाग अधीक्षक अभियंता एस.एस. भगत यांनी सांगितले.
advertisement
धक्कादायक वास्तव! शाळेला जायला रस्ता नाही, विद्यार्थ्यांचा जीवघेणा प्रवास, थर्माकोलची बोट अन्...
छत्रपती संभाजीनगर जिल्ह्यात शेंद्रा, बिडकीन आणि वाळूज ही औद्योगिक विकासाची प्रमुख केंद्रे मानली जातात. ऑरिक सिटीअंतर्गत बिडकीन आणि शेंद्रा, तर एमआयडीसीअंतर्गत वाळूज, चिकलठाणा आणि परिसरातील इतर भागांचा समावेश होतो. विशेषतः बिडकीन परिसरात सरकारने सुमारे 8 हजार एकर जमीन संपादित केली असून येथे मोठ्या उद्योगांची पावले वळत आहेत. एथर एनर्जी, टोयोटा किर्लोस्कर, जेएसडब्ल्यू ग्रीन मोबिलिटी आणि लुब्रीझोलसारख्या नामांकित कंपन्यांनी गुंतवणुकीची घोषणा केली आहे. यामुळे जवळपास 1261 कोटी रुपयांची गुंतवणूक होणार आहे, त्यामुळे हजारो तरुणांना रोजगाराच्या संधी निर्माण होणार आहेत.
रिंग रोडसाठी 60 मीटर रुंद जमीन आवश्यक
करमाड-एकोडपासून सुरू होणारा आणि पाचोड मार्गे थेट ढोरेगावपर्यंत जाणारा प्रस्तावित रिंग रोड शहरासाठी दिलासादायक ठरणार आहे. हा मार्ग कार्यान्वित झाल्यास अवजड वाहतूक थेट शहराबाहेरून वळवता येणार असून, छत्रपती संभाजीनगरमधील दैनंदिन वाहतूक कोंडी मोठ्या प्रमाणात कमी होण्याची शक्यता आहे. यामुळे प्रवासाचा वेळही लक्षणीयरीत्या वाचणार असून उद्योगांसाठी जलद दळणवळणाचा नवा पर्याय उपलब्ध होणार आहे.
शेंद्रा, बिडकीन आणि वाळूज या औद्योगिक पट्ट्यांना एकमेकांशी जोडण्यासाठी या रिंग रोडची गरज दीर्घकाळ जाणवत होती. त्याची दखल घेत राज्य शासनाने अखेर या महत्त्वाच्या प्रकल्पाला मंजुरी दिली आहे. प्रस्तावित रस्त्यासाठी सुमारे 60 मीटर रुंदीची जमीन संपादित केली जाणार असून, ग्रीनफील्ड पद्धतीने हा रस्ता विकसित केला जाणार आहे. या प्रकल्पामुळे औद्योगिक वाहतूक सुरळीत होण्यासोबतच शहराचा सर्वांगीण विकास अधिक वेगाने होईल, असा विश्वास व्यक्त केला जात आहे.
भूसंपादन निधीला मान्यता
करमाड ते बिडकीन मार्गावरील 32 किमी आणि बिडकीन ते ढोरेगाव 35.8 किमी रस्त्याच्या भूसंपादनासाठी आवश्यक निधी मंजूर करण्यात आला आहे. करमाड-बिडकीन मार्गासाठी 315 कोटी रुपये तर बिडकीन-ढोरेगाव मार्गासाठी 430 कोटी रुपये निधी दिला जाणार आहे.