‎अजिंठा लेणी पाहण्यासाठी आले अन् अचानक मधमाशांचा हल्ला; चिमुरडीसह 35 पर्यटक जखमी!

मिळालेल्या माहितीनुसार, मध्यप्रदेशातील जबलपूर येथून एक कुटुंब खास अजिंठा लेणी पाहण्यासाठी आले होते. लेणी परिसरात फिरत असताना अचानक मधमाशांनी त्यांच्यावर हल्ला केला. या हल्ल्यात त्या कुटुंबातील एका लहान मुलीच्या घोट्याला मधमाशांनी अनेक ठिकाणी चावा घेतल्याने ती गंभीर जखमी झाली.

आपल्या मुलीला वाचवण्यासाठी पालकांनी केलेली धडपड आणि मधमाशांपासून बचाव करण्यासाठी पर्यटकांनी घेतलेली पळापळ यामुळे काही काळ परिसरात धावपळ उडाली. घटनेची माहिती मिळताच स्थानिक प्रशासन आणि सुरक्षा रक्षकांनी तातडीने घटनास्थळी धाव घेतली. जखमी पर्यटकांना त्वरित उपचारासाठी जवळच्या रुग्णालयात हलवण्यात आले असून त्यांच्यावर उपचार सुरू आहेत.

दरम्यान, अजिंठा लेणी परिसरात मधमाशांच्या हल्ल्याच्या घटना यापूर्वीही घडल्या आहेत. त्यामुळे अशा प्रकारच्या घटनांना आळा घालण्यासाठी ठोस उपाययोजना करण्याची गरज असल्याची मागणी पर्यटकांकडून होत आहे. विशेषतः लहान मुलांवर झालेल्या हल्ल्यामुळे पर्यटकांमध्ये काही काळ दहशतीचे वातावरण पसरले होते.

‎