नेमकं प्रकरण काय ?
कोपरगाव तालुक्यातील डाऊच शिवारात 8 ऑगस्ट रोजी एका महिलेचा अर्धवट जळालेला मृतदेह आढळला होता. मृतदेहाची ओळख पटत नसल्याने पोलिसांसमोर तपासाचे मोठे आव्हान निर्माण झालं होतं. संबंधित महिलेचा गळा आवळून खून करण्यात आल्याचे शवविच्छेदन अहवालातून समोर आले होतं. त्यानंतर कोपरगाव शहर पोलिसांनी परिसरातील पेट्रोल पंपावर चौकशी करत आणि सीसीटीव्ही फूटेज तपासत धागेदोरे शोधण्याचा प्रयत्न केला.
advertisement
तसेच अहिल्यानगर जिल्ह्यासह नाशिक आणि संभाजीनगर जिल्ह्यात मृतदेहाशी मिळत्या जुळत्या महिलेची मिसिंग तक्रार दाखल आहे का? यासंदर्भात माहिती पोलीस गोळा करत होते. याच दरम्यान संजय उर्फ बापू मोहिते नामक व्यक्ती घरातून गायब असल्याची तक्रार त्याच्या नातेवाईकांनी कोपरगाव तालुका पोलीस ठाण्यात दाखल केली होती. पोलीस या मिसिंगचा तपास करत असताना संशय बळावला आणि खुनाच्या गुन्ह्याची उकल झाली. अर्धवट जळालेला मृतदेह हा वनिता उर्फ वर्षा संजय मोहिते हिचा असल्याचे आणि पती संजय याने साथीदाराच्या मदतीने तिचा खून केल्याचे समोर आले.
खूनाची लिंक सापडताच पोलिसांनी आरोपी पती संजय मोहिते याला राहाता तालुक्यातील सावळीविहीर हद्दीतून ताब्यात घेतलं. मोहिते पती पत्नीमध्ये सातत्याने कौटुंबिक वाद होत असल्याने अनेक दिवसांपासून पत्नी वनिता वेगळी रहात होती. त्यामुळे आरोपी पतीने तिला पुण्याला जायचंय, असं सांगून साथीदाराच्या मदतीने वनिताचा गळा आवळला. तसेच चाकूने वार करून तिला तिची हत्या केली पुरावा नष्ट करण्यासाठी दुचाकीतील पेट्रोल टाकून तिचा मृतदेह जाळण्याचा प्रयत्न केला, अशी कबुली आरोपी पती संजय मोहिते याने पोलिसांना दिली आहे..
आरोपी संजय याला न्यायालयाने सहा दिवसांची पोलीस कोठडी दिली असून त्याच्या फरार असलेल्या साथीदाराचा शोध कोपरगाव पोलीस घेत आहेत. मृतदेह जळालेल्या अवस्थेत असतानाही पोलिसांनी अवघ्या काही दिवसात खुनाचा उलगडा करत आरोपीला गजाआड केल्याने कोपरगाव शहर पोलिसांच्या कामाचे कौतुक होत आहे...