वाहनावर हल्ला
नागपुरात अत्यंत गंभीर घटनेत ईव्हीएम घेऊन जाणाऱ्या चार चाकी वाहनावर हल्ला करून त्या वाहनाची मोडतोड करण्यात आली आहे. मध्य नागपूर विधानसभा क्षेत्रातील किल्ला परिसरातील बुथ क्रमांक 268 च्या जवळ बुधवारी संध्याकाळी 7 ते 7.30 वाजताच्या दरम्यान ही घटना घडली आहे. जेव्हा किल्ला परिसरात बुथ क्रमांक 268 वरून ईव्हीएम घेऊन जाणारी तवेरा एसयुव्ही मतदान केंद्रातून बाहेर निघाली, तेव्हा त्या गाडीवर हल्ला करण्यात आला.
advertisement
त्यावेळेस परिसरातील दक्ष नागरिक आणि काही भाजप कार्यकर्त्यांनी हस्तक्षेप केले आणि पोलिसांना बोलावले. मात्र तोवर दगड आणि लोखंडी रॉड्सने हल्ला करत evm घेऊन जाणाऱ्या तवेरा कारची जबर मोडतोड करण्यात आली होती.
ईव्हीएम सुरक्षित...
पोलिसांनी माहिती मिळताच लगेच घटनास्थळी धाव घेतली आणि ईव्हीएम तसेच तवेरा एसयुव्हीमधील सरकारी कर्मचाऱ्यांना सुरक्षित बाहेर काढले. मोडतोड करण्यात आलेली तवेरा एसयुव्ही कार पोलिसांनी कोतवाली पोलीस स्टेशनमध्ये आणली. त्यानंतर ईव्हीएम आणि सरकारी कर्मचाऱ्यांना सुरक्षितरित्या त्यांच्या निश्चित ठिकाणी पोहोचवले आहे.
या घटनेनंतर कोतवाली पोलीस स्टेशन समोर मोठ्या संख्येने भाजप आणि काँग्रेस कार्यकर्ते गोळा झाले होते. मात्र वरिष्ठ पोलीस अधिकाऱ्यांनी कोतवाली पोलीस स्टेशनकडे धाव घेत सर्व कार्यकर्त्यांची गर्दी कमी केली. या हल्ल्यामागे काँग्रेस कार्यकर्त्यांचा हात असल्याचे म्हटले जात आहे.