मिळालेल्या माहितीनुसार, हा धक्कादायक प्रकार गुरुवारी संध्याकाळी माटे चौकातील विशाल पेट्रोलियमवर घडला आहे. सायंकाळी साडेचारच्या सुमारास तीन ते चार दुचाकीवर बसून गावगुंडांची एक टोळी पेट्रोल पंपावर दाखल झाली होती. दारूच्या नशेत असणाऱ्या या गावगुंडानी पेट्रोल भरणाऱ्या इतर वाहन चालकांना धडक दिली. त्यानंतर पेट्रोल पंपावरील कर्मचाऱ्यांशी वाद घालत त्यांना मारहाण सुरू केली.
advertisement
यावेळी काही गुंडांनी चाकूचा धाक दाखवत पंप कर्मचाऱ्यांच्या हातातील पेट्रोल पंपाचे पैसे लुटण्याचाही प्रयत्न केला. मात्र इतर वाहन चालकांनी आरडाओरडा केल्यामुळे हे गाव गुंड धमक्या देत तिथून पळून गेले. ही संपूर्ण घटना पेट्रोल पंपावरील सीसीटीव्ही कॅमेऱ्यात कैद झाली आहे. या घटनेनंतर पोलिसांनी तक्रार नोंदवली असून गावगुंडांचा शोध घेतला जात आहे.
व्हायरल व्हिडीओमध्ये दारुच्या नशेत असलेले काही तरुण पेट्रोल पंपावरील कर्मचाऱ्यांना मारहाण करताना दिसत आहेत. यातील एक आरोपीने थेट अंगावर धावत येत एका पेट्रोल कर्मचाऱ्याचा नरडं दाबण्याचा प्रयत्न केला आहे. तर इतर आरोपींनी कर्मचाऱ्याला मारहाण केली आहे. या घटनेचा व्हिडीओ पोलिसांना देण्यात आला असून सीसीटीव्ही फुटेजच्या आधारे पोलीस आरोपींचा शोध घेत आहेत. या घटनेचा पुढील तपास पोलीस करत आहेत.